Motel

Een motel (mengwoord uut Engels motor en hotel), in de VS ok motor hotel of motor lodge enuumd, is een soortement hotel det uuteprakkezeerd is veur volk det mit de auto onderweg is. Motels bint daorumme typisch langs deurgaonde wegen te vienden. Deurgaons bint ze I-, L- of U-vörmig en bestaot ze uut ien of twee verdiepings. Bij de kamers op de benedenverdieping kuj direct via de parkeerplaatse komen, en bij die op de baovenverdieping aover een gaank die laangs de butenmure löp. Behalve de kamers hej nog de lobby, 't ketoor van de manager en soms een klein restaurant.

't L-vörmige Star Lite Motel in Dilworth, Minnesota

Allewal motels vake femiliebedriefies bint, waor ze in de VS wal naor verwiest as mom and pop motels, bint der ok ketens.

Oorsprong

De term motel kump van 't eerste motel ooit, 't Milestone Mo-Tel (later Motel Inn) in San Luis Obispo, Californië, det in 1925 de deuren lösdeu en in 1991 dichtegunk. Mit det vanof de jaoren twintig de grote laandelijke wegennetwarken anelegd wördden, wördden 't gebrukelijker um langere ofstaanden te varen. Automobilisten wolden goedkope aovernachtingsmeugelijkheid dichte bij de grote wegen. Motels namen staorigan de plaatse in van de wat oldere auto camps, waor automobilisten kunden parkeren en in ofzunderlijke tenten of hutten sleupen.

Ontwikkelings

Nao-oorlogse motels trökken gasten mit neonbörden, waorbij futuristische googie-ontwarpen in trek waren. Aandere laanden namen 't motelconcept (en de name derveur) aover. In de jaoren zestig hadden motels heur grootste blui; daornao gungen ze op heur retour, mit det 't verkeer aover neie autosnelwegen eleid wördden en der ketenhotels verschenen bij verkeersknooppunten. Verscheiden historische motels in de VS staot vandage de dag op 't National Register of Historic Places.

In de cultuur

In Amerikaanse speulfilms koomt motels en motel-achtige, goedkopere hotellegies nogal ies veur. Vake giet 't niet um een al te positief verbaand, mar wördt der misdaod uutebield die baot hef bij de anonimiteit van motels. Een beroemd veurbield is Alfred Hitchcock zien film Psycho, naor de gelieknamige roman van Robert Bloch, die diels in een motel speult. Ok in de popmeziek is 't begrip veule opedeuken; zo hej de band The Motels en is 200 Motels een film en album van Frank Zappa.

Uutstalling

• 
  Boots Court in Carthage, Missouri
• 
  Wigwam Motel in Holbrook, Arizona
• 
  Kamer in 't Wigwam Motel in Holbrook, Arizona
• 
  Arrow Motel/Rainbow Motel in Phoenix, Arizona
• 
  Motels in Reno, Nevada
• 
  Ansicht van The Royle Motel in Kittanning, Pennsylvania
• 
  Motel in Hongarije, 1973
• 
  Motel in Finlaand, 2016

Dit artikel is eschreven in 't Zuudwest-Drèents.