Na-Denétalen

(döärstüürd vanaf "Na-Denétoalen")

De Na-Denétaalfamilie heurt bij de oorspronkelijke Amerikaanse talen. Lichtkaans is dizze familie een subfamilie van de Dené-Jenisejische talen.

Verspreidingsgebied van de Na-Denétalen

De Na-Denétalen kuj verdielen in twee subfamilies. De eerste bestiet uut mar iene taal, 't Tlingit. Dizzend wördt epraot deur 700 mèensen die woont op eilaanden veur de Canadese kust. De aandere femilie is 't Athabaskisch-Eyak, wat aj weer kunt onderverdielen in twee subfamilies: de Athabaskische talen, waoronder 't Apache, Tagish en Navajo, waor nog haoste 200.000 sprekers van bint, en 't in 2008 uutestörven Eyak. Mangs wördt 't Haida as darde takke van de Na-Denétalen eziene, mar die zienswieze is drokte aover en de mieste taalkundigen beschouwt 't Haida as isolaat.

Een biester umstreden theorie van de Rus Sergei Starostin wil det de Na-Denétalen mit onder aandere de Noord-Kaukasische talen, de Sino-Tibetaanse talen en zölfs 't Baskisch onder de Dené-Kaukasische taalfamilie vaalt. De aovergrote meerderheid van de taalkundigen wis dizze hypothese van de haand.

Det de Na-Denétalen kunnigheid hebt an de Jenisejische talen uut Siberië is wal annemelijk. In 2008 concludeerden de belangriekste kenners van de Na-Dené- en Jenisejische taalfamilies det Na-Dené en Jenisejisch mit mekare de Dené-Jenisejische familie vörmt.[1] DNA-onderzuuk wis naor een verbaand mit de komst van de Paleo-Eskimo's uut Siberië.

De Na-Denétaalfamilie vörmt mit de Algische en de Uto-Azteekse taalfamilies iene van de drei grote taalfamilies van Noord-Amerika. Een bulte van de Na-Denétalen bint daorumme ok hiel best bestudeerd.

Michael Krauss is een Amerikaans taalkundige die de Na-Denétalen briedvoerig bestudeerd hef.

Rifferenties bewark

  1. Linguists demonstrate Siberian-North American link Dene-Yeniseic Symposium, 26, 27 en 29 febrewaori 2008, Fairbanks en Anchorage, Alaska.
  Dit stok is eschreven in 't Zuudwest-Drèents.