Ni'je Hanze Interregio

De Ni'je Hanze Interregio muj niet in de wiere halen mit de Ni'je Hanze.

De Ni'je Hanze Interregio (NHI) is een economisch, wetenskoppelijk, politiek en bestuurlijk bondgenootskop tussen de Duutse dielstaoten Bremen en Nedersaksen en de Nederlaanse pervincies Frieslaand, Grunnen, Drenthe en Oaveriessel. De name kump van de laat-middelieuwse/vrogmoderne Hanze, een biester succesvol Noord-Europees bondgenootskop van handelsgildes. De NHI hebt ze op 20 meert 1992 in Bremen op-ericht. 't Verbaand hef zien stee in Ollnborg en hef as motto Wi'j bouwt netwarken.

Doelen

De NHI wil inspeulen op de kaansen die as 't ni'je 'Europa zonder grèenzen' biedt veur grèensoavertredende samenwarking. De mandielige belangen van de NHI-regio mut 't bondgenootskop anwiezen. Binnen de NHI bestiet een netwark van relaoties. 't Verbaand gef bi'jienkomsten, dut analyses en ondersteunt projecten, beveurbield op 't gebied van energie en infrastructuur.

Projecten

D'r is een Europese Juridische opleiding uutewarkt mit de Hanse Law School, een samenwarkingsverbaand maank de universiteiten van Bremen, Grunnen en Ollnborg. Naor model van de NHI is 't pregramma Hanse Passage op-ezet, det bestiet uut economische samenwarkingsprejecten maank een bulte orgenisaoties in vieftien Noord-Europese regio's van Engelaand töt an Litouwen. In mei 2008 hölden ze in Ollnborg de vakconferentie Op weg hen íen Europese energieregio: Perspectieven veur Nederlaans-Duutse samenwarking op 't gebied van energie binnen de Ni'je Hanze Interregio.

Bron

• Webstee van de Ni'je Hanze Interregio

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.