Oldste stad van Nederlaand
De oldste stad van Nederlaand is nen status den deur verskillende steaden wöd op-e-eist.
Begripsbepoaling
bewarkZowal Veurburg, Nimwaege als Maastricht kunt ansproak maken op dizzen status umdat de bronnen doarveur redelek vaste staot en de eneumden data van archeologiese vöndsten neet wiet uut mekare loopt en de eneumde steaden al dee tied bewond bunt ebleaven mit nen vorm van zelfstaandig stadsbestuur op dezelfde plaatse.
Veurburg
bewarkIn 1963 kwam den Nimwaegsen professor in de archeologie J. Bogaers tot n besluut dat Veurburg de oldste stad van Nederlaand was. Onderzook van nen Romeinsen mielpoal (n milliarium) den bi-j Rieswiek was evonden, had him doarvan oavertuugd. Veurburg heetten toon Forum Hadriani, verneumd noar keizer Publius Aelius Hadrianus. Noa n bezook van keizer Hadrianus in 121 noa Christus kreg de plaatse marktrechten.
Nimwaege
bewarkDen opvolger van Bogaers, Jan Kees Haalebos zörgden veur wetenschoppelek bewies dat Nimwaege rundumme et joar 98 stadsrechten zol hebben kreggen. Den Moastrichtsen stadsarcheoloog Titus Panhuysen kwam tot n besluut dat Nimwaege al in 17 noa Christus ne stad möt wean ewest. Dit besluut trok hi-j noa et bestuderen van den Nimwaegsen godenpieler wat nen erezuul ewest zol wean veur keizer Tiberius den van 14 tot 37 noa Christus regeerden. In 2005 blek uut onderzook noar munten, dee bi-j opgroavingen in Nimwaege wödden evonden , dat Romeinse soldoaten al in 19 veur Christus in Nimwaege waren. In et joar 69 noa Christus wodden Nimwaege tiedelek verloaten noadat de stad in braand estokken was. De ni-je stad wierd pas rundumme 400 wier opebouwd.
Moastricht
bewarkDen vondst in 2007 van nen Keltiesen stroatweg in den kelder van Hotel Derlon an et Onzen Leeve Vrouweplein in Moastricht möt de proateri-je in ne streumversnelling bringen. Volgens sommige archeologen dateert dizzen weg uut rundumme 500 veur Chr. en wodden de streake rundumme dee tied al bewond. As staedn mit bi-jkommende rechten (municipium) bunt doar in de Romeinse tied moar (zowiet bekend) twee steedn ewest (eleagen in et Veurburg en Nimwaege van vandage). Moastricht is dit nooit ewest.