Onno Zijlstra

Onno Klaas Zijlstra (Wassenaar, 14 jannewari 1949) is een Nederlaandse filosoof.

Hij gruide op in de arbeidersbuurte van Wassenaar as de jongste van zes kiender van Friese olders; zien va was tummerman. Nao in 1982 an de Vrije Universiteit Amsterdam te promoveren op de filosofie en cultuurkritiek van José Ortega y Gasset, gaf Zijlstra daor filosofie, asok an de ArtEZ Hogeschool voor de Kunsten in Zwolle en an de Protestantse Theologische Universiteit.

Zijlstra hef een riege boeken op zien name. In Het kunstwerk en de zin van het bestaan (1998) giet e in op 't verbaand tussen keunst en filosofie. Zien wark Authentiek. In tijden van massamedia, egocultuur en consumentisme (2021) is een pleidooi veur een loek uuteprakkezeerd, sociaal en moreel idee van authenticiteit. Zijlstra stelt det authenticiteit in tieden van massamedia, egocultuur en consumentisme niet allennig meugelijk, mar zölfs barre neudig is.

In Kunst en de zin van het bestaan (2022) schrif e det keunst onlösmakelijk verknupt is mit de vraoge naor betiekenis in 't levend. In tieden van onzekerheid as de oezende wördt de vraoge hoe of keunst kan hölpen te prakkezeren aover de zin van waw doet, nog belangrieker. Hij giet in op zes wiesgeren die de keunst naodrokkelijk bij de zinvraoge betrökken hebt: Kant, Hegel, Schopenhauer, Kierkegaard, Nietzsche en Wittgenstein.

Ok det jaor verscheen Het leven als schipbreuk - De crisisfilosofie van Ortega y Gasset. Uutgaankspunt van dit warkien is dew te maken hebt mit een wooncrisis, een klimaotcrisis, een coronacrisis en een politieke crisis. Volgens Zijlstra lat Ortega y Gasset zien filosofie zien wat 't levend in tieden van crisis typisch mèenselijk mak. Crises muj niet uut de wege gaon, zeg Zijlstra, mar juust beleven en deurdenken.

Zijlstra is een breurtien van de dichter en predikaant Jaap Zijlstra (1933-2015).

Schrieverije

Authenticiteit en vervreemding. Filosofie en cultuurkritiek van José Ortega y Gasset (Amsterdam, 1982)
Ethiek en esthetiek zijn een. Over Wittgensteins Tractatus, stelling 6.421 (Kampen, 1990)
Als ik Job niet had. Tien denkers over God en het lijden (redactie mit Albert de Lange, Zoetermeer, 1997)
Het kunstwerk en de zin van het bestaan (Kampen, 1998)
Letting Go. Rethinking Kenosis (redactie, Bern, 2002)
Dilemma's. Een kortere inleiding in de filosofie (Udel, 2003)
Language, Image and Silence. Kierkegaard and Wittgenstein on Ethics and Aesthetics (Bern, 2006)
Wat doet die rode vlek daar linksboven? Inleiding in de esthetica (Arnhem, 2007)
De vertoning. Een pleidooi voor individualiteit en verbeelding (mit Suzan ten Heuw, Arnhem, 2011)
Kierkegaard in discussie (Budel, 2012)
Wat bezielt Kierkegaard? Zeven essays over een dwarse denker (redactie mit Renée van Riessen, Budel, 2014)
Reflecties. 25 kunstwerken 24 filosofen (mit Wendy Janssen, Eindhoven, 2016)
Een zekere twijfel. Inleiding in de westerse filosofie (Eindhoven, 2018)
Verbeelding. Over waarneming en kunst (Arnhem, 2020)
Authentiek. In tijden van massamedia, egocultuur en consumentisme (Amsterdam, 2021)
Het leven als schipbreuk - De crisisfilosofie van Ortega y Gasset (Leusden, 2022)
Kunst en de zin van het bestaan (Arnhem, 2022)

Dit stok is eschreven in 't Zuudwest-Drèents.