Onze Laive Vraauw van de Besloten Toen

De Roomse kluus van Onze Laive Vraauw van de Besloten Toen is jongste van Nederlaandse kluzen. Zai is ien 2001 sticht ien veurmoalege parochiekìrk van Waarfhoezen ien prevìnzie Grunnen.

Onze Laive Vraauw van de Besloten Toen

Kluus ien Waarfhoezen baauwt deur op gewoonte van Limbörgse en Broabantse kluzenoars dij ontstoan is in tied van tegenreformoatsie ien 16e aiw. Leste kluusfroater van dij gewoonte is ien 1930 sturm in Kluus op Schaelsbaarg bie Valkenbörg oan Geul. Ien tegenstellen töt mainste kluzen ien t boetenlaand haren dizze kluzen n openboare kapel dij voak n rol speulde ien ploatselieke volksdevotie.

Sunt Twijde Vatikoanse Konsilie t kluzenoarsideoal het willen doun heropleven is der ien joaren doarnoa nije regelgeven kommen. Ien kìrkeliek wetbouk (Codex Iuris Canonici) wordt veur kluzenoars n strakkere vörm van oafzundern verlangd. Zodounde is der ien Waarfhoezen n oafgesloten terrain (klausuur) woarbinnen de poater dij der woont (poater Hugo) waarkt en bidt. Ien kìrk kins dat zien aan t imposante klausuurhek dat priesterkoor van schip schaaidt.

Zo as ien kontemplatieve kloosters wordt ien Waarfhoezen t offizie onderholden. t Wordt zongen ien t Latain. Ienvloud van Limbörgse gewonen is maarkboar aan verschaaidene touvougens oet volksdevotie, zo as haardop bidden van rozenkraansgebed en verschaaidene litanies dij zongen worden. Vereren van hailege Antonius-Abt van wel een reliekschrain aanwezeg is ien t retoabel van rechter ziedaltoar nimt doarbie n biezundere ploats ien. Ook ienrichten van kìrk verraid t veurtborduren op 17e aiwse veurbeelden veur barokke elementen.

Noast oale zuudelieke kluzenoarsgewoonte bennen der ien Liturgie nog wat aanere ienvlouden maarkboar. t Feit dat der n poar vrijwilligers Russisch-orthodox bennen, het der tou laid dat er s oavends noa kompleten Jezusgebed zongen wordt (ien t Grieks.) Verder is veuraal ient gebruukte dialekt van t gregorioans de ienvloud van kartuzergewoonte maarkboar.

Waarfhoezen as Mariaploats

Prozessie van Wij-Hörn noar Waarfhoezen

Mainste bezuikers van kìrk kommen ien t biezunder om Maria te vereren. De beeltenis 'Onze Laive Vraauw van de Besloten Toen' is n levensgrode mouder van smaart van beeldhouwer Miguel Bejarano Moreno oet Sevilla. Hai is ain van beeldhouwers dij spezialiseerd bennen ien t moaken van beelden veur de beroemde prozessies ien goie week ien Andaluzie. Dizze verbeelding van medelieden van Maria mit heur Zeun trekt veul bedevoartgangers noar Waarfhoezen, ien t biezunder mensen dij heur zurgen moaken over heur kiender, getuuge t intentsiebouk. Ook kommen er tiedens bedevoartseizoen (ien Waarfhoezen van sikkom haalf April tot en mit t patroonsfeest op 15 September) regelmoatig groepen. Het ontstoan van van dizze bedevoartskultuur is woarschienliek te danken aan t feit dat er ien wiede umtrek naargens een dergelieke ploats van volksdevotie is.

Aan devotie veur Onze Laive Vraauw van de Besloten Toen is een bruierschap (m/v) verbonden dij t gebed veur welzien van Kìrk en bisdom tot doul het. Drijmoal ient joar tuugt men mit n kruus en voandels van parochiekìrk ien Wij-Hörn noar Waarfhoester kluuskìrk om Kompleten te zingen.

Buusdouk ruilen

Een biezunder gebruuk ien Waarfhoezen is t "ruilen van buusdouk." Maria dragt ien Waarfhoezen een witte buusdouk om heur troanen mit oaf te wissen. Gelovigen vroagen om dij buusdouk ien ruil veur n nije dij ze zulf mitnemen of ter ploatse kopen. Ze schenken Maria's buusdouk aan zaiken of mensen dij veur n stoere opdracht stoan (zoas exoamens.)

Boetende hìnwiezen

• Webstee van kluus en hailigdom

Dizze pagina is schreven ien t Hoogelaandsters