Palthebos

't Palthebos is een kuierbossien det aj vienden kunt op 't dörp Ni'jlusen in Oaveriessel.

Een open veld in 't Palthebos, esteuken in een winters jassien

Geschiedenis

't Palthebos is enuumd naor de welgestelde femilie Palthe, oorspronkelijk ofkomstig uut Twente/Bentheim. In 1754 wördden Jan Arend Palthe domeneer op Ni'jlusen. Tiedens zien vieftigjaorige predikaantschop verwörf hi'j nog aordig wat invloed en bezittings, waoronder 't Palthebos. Dit bleef töt an 1928 femiliebezit; toen kwaamp Gulia Palthe, 'de laandvrouwe van Ni'jlusen', de leste telg van de femilie, uut de tied en kwaamp 't bos in beheer van de daornaost elegen hervörmde karke.

Wat aj viendt in 't Palthebos

An de raand van 't Palthebos lig sund 1998 't dörpshistorische Museum Palthehof van de historische veriening 'Ni'jluusn van vrogger'. Naost 't museum lig een luttik old karkhof, in 1943 esleuten.

De 'bult van Dirk-Jan' is een veurmaolig openlochttheater, half umcirkeld deur een briede sloot. Op dizze bult wördt, as d'r sni'j lig, sleegien ereden.

't Palthebos bevat een antal weides, die deur lanen mit bomenriegen umzoomd bint en daoraj - seizoens-ofhaankelijk - dieren in vienden kunt. Vaste bewoners bint de segen en herten. In de zomer loopt op aandere weides koenen en/of peerde.

An de raand van 't Palthebos staot verscheiden bieldhouwwarken.

Slag um Ni'jlusen

Op 21 en 22 april 2007 wördden in en um 't Palthebos een veldslag nao-espeuld tussen troepen van Napoleon en de alliaansie. Dizze veldslag stund al rap bekend as de 'Slag um Ni'jlusen', allewal d'r nooit een warkelijke Slag um Ni'jlusen ewest hef. De slag, daoras volk uut binnen- en butenlaand an mitspeulden, was organiseerd deur de Stichting Midzomeravondfestival Nieuwleusen, in samenwarking mit de Napoleontische Associatie der Nederlanden (NAN) en de daorbi'j an-esleuten verienings veur lèventige geschiedenis.

Rifferenties

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.