Paspoort

n Paspoort (vake of ekörtt töt n pas) is n offisjeel beukn met doarin de perseunlike gegeewns van n persoon, zo as dee zeent vaste legd duur t laand woer't den persoon wegkeump. n Paspoort maakt dus n persoon offisjeel inwonner van n laand. Bie t oawerstekn van ne laandsgreanze wörd meestal noar n pas evroagn. Duur n pas vrög dan t laand van de reaiziger an t laand van ankomst of ze öarn borger tooloatn weelt.

Paspoort van de Vrieje Reppubliek Tweante

n Naam paspoort wörd ook wal es as beeldsproake broekt, as dr helemoal gin papierwoark an te passe keump, zo as bievuurbeeld bie n digitaal paspoort um op bepoalde websteas roond te kiekn, of n Medisch Paspoort wat leu met ne bepoalde andoning bie zik köant dreagn um hulpverleners rap informasie te geewn as t neudig is.

Iederene wat Neerlaander is kan bie de gemeente n paspoort anvroagn, of bie t Neerlaandse konsulaat a'j in t boetnlaand zitt. Hiervuur mu'j wal eulder wean as 18, aanders mu'j t ene van de oolders of verzörgers loatn doon.

Gegeewns

In n laandspaspoort stoat aait de volgende gegeewns:

Nen foto van n pashoolder
n Achternaam van n pashoolder
n vuurnaam of vuurnaamn van n pashoolder
Of n pashoolder man of vrouwe is
leankte
geboortedoatum en -plaatse
nasjonaliteat
ne haandteekning
t persoonsnommer (burgerservicenummer) (in Neerlaand)
plaatse en doatum van oetgifte
naam van paspoortverskaffer

Beskriewing

De eerste "bladziede" is van plastik, met doarop alle persoonsgegeewns, echtheaidskenmoarkn en ne duurdrok van nen pasfoto met hele fiene geatjes, zode'j n silhouetfoto kriegnt a'j dee geatjes teegn t lecht hooldt.

Elk Neerlaandse paspoort hef n uniek dokumeantnommer van 9 karakters: de eerste beaide zeent letters, 3 t/m 8 zeent letter of siefers, en karakter 9 is aait n siefer. De letter "O" wörd nit gebroekt. t Siefer "0" wal. Disse karakters wordt duur elke bladziede ponst in teelkens n reuster van 5 x 5 geater.

t Standaard paspoort hef 34 bladziedes met ruumte vuur visums en aandere anteekingn van oawerheaidsinstellingn. Disse anteekningn zeent in wat laandn verplicht um dr duurhen te meugn. Op de 33ste bladziede steet n oawerzicht met ne oawerzetting van Neerlaandse terme in aandere sproakn.

Um te zorgen at leu gin vaalse paspoortn goat maakn, wordt dr in de offisjele paspoortn verskeaidene echtheaidskenmoarkn maakt, zo as watermoarkn, mearklurige steampels, en dr wörd spesjaal papier gebroekt.

Geeldigheaid

n Neerlaands paspoort kan vief joar laank gebroekt wordn vuur alle laandn (tenzij at t dr aanders in steet). Wat laandn vroagnt nöast n paspoort ook nog n visum. Vake eesket disse laandn det t paspoort nog vuur nen bepoaldn tied geeldig mut wean.

Chip

In de EU kriegnt paspoortn rechtevoort n chipke met doarop verskeaidene gegeewns van n pashoolder. Doaroawer is nog wal t een en t aander te doon ewest, want nit iederene was t dr met eens det de vingerofdrukn in ne sentrale gegeewnsbaanke op esloan zoln wordn. Op n chip stoat dezelfde dinge as op t papier, met doar nog bie de vingerofdrukn.

Verlees

n Pas heurt de stoat too. A'j um verleest, mu'j dr angifte van doon bie de politsie. Nen niejn anvroagn kost oe geeld. A'j n pas in t boetnlaand verleest kö'j n tiedelik noodpaspoort anvroagn, wat töt maximaal n joar geeldig blif.

Keender

Vroger, töt 26 juni 2012, ko'j de keender töt 16 joar oold bie op n pas loatn zetn, mer dee regel hef de regearing dr achterhen edoan. De keender mut rechtevoort ook n eegn paspoort of identiteatskaarte hebn.

Aandere soortn paspoortn

Leu dee't in t leager zitt, kriegnt n apart paspoort, wat rechtevoort is vervöngn duur de zoneumde smartcard met nen chip. Dit paspoort har dezelfde grötte as n borgerpaspoort, mer n kaft was greun (vuur laandmachtssoldoatn) of blaauw (vuur lochtmachtssoldoatn). In dit paspoort (op disse kaarte) steet nöast de gewone paspoortgegeewns t leagerregistrasienommer, n raank van n soldoat, zinne bevörderingn en de riebewieze dee't he haald hef.

Wee't vuur zaakn völle reaizet noar verskeaidene laandn dee't t met mekoar in n daamp hebt, kan n zaaknpaspoort anvroagn. Hiermet krig n hoolder gin probleemn at de viejaandige laandn van mekoar n steampel in t paspoort treft. Dit keump bievuurbeeld vuur tusken Syrië en Israël. n Baas van n zaaknreaiziger mut skriftelik loatn verkloarn at dit paspoort neudig is.

Hoesdeers

A'j binn de EU oewn hoond, katte of fretjen met weelt nemn op reaize, mu'j n hoesdeerpaspoort hebn. Hierin stoat de gegeewns van n hoesdeerhoolder, ne foto van t deer, beskriewing van t soort, geslacht, ras en wo't t deer dr oetzut, nommer van n identifikasiechip, en n bewies van ineanting teegn honsdolheaid. Wat EU-laandn hebt nog verskeaidene aandere vereestes op t hoesdeerpaspoort. t Hoesdeerpaspoort is seend 2004 verplicht en wörd duur veeärtse oet-eskreewn.

Mooi um te weetn

Bie de Vrieje Reppubliek Tweante kö'j n (onoffisjeel) Tweants paspoort anvroagn.

Oetgoande koppeling

Webstea met hudige paspoortinformasie