Kört nao 't jaor 1200 werd de Hiemser karke vervangn deur n stienn gebouw. Umme de karke op 'n stewig ondergrond te bouwn, werdn grote zwarfkeien in de grond eplaast. Tussen dizze stienn werd völle specie an-ebrach.
Op de zwarfkeien met specie werdn de muurn ebouwd. Die muurn waarn emaakt van iezeroerblokkn. [[Iezeroer]] is n netuurstiene waorin veul iezer zit. Vrogger is 't in [[Sallaand]] veul gebruukt, umdat t hier in grote hoeveulheedn veurkwaamn. De stadsmuure van Haddnbarreg is ok emaakt van iezeroer. Dizze stiensoort haaln men uut de berring van de [[Vechte]]. t Werd met scheepn an-evoerd. Dat was nie aaltied zonder risico. In 1209 werd n gebedsdag eholln veur de mannen die in noodweer waarn verdrunkn, toen zi'j stienn haaldn veur de karke in Hiemse.
Later werd de karkmuurn emaakt van [[bakstien|bakstiene]]. Men hef bereeknd dat de karke waorschienlijk 6,30 meter bried was en 15,50 meter lange. Vanof de [[19e eeuw|19e eeuwe]] is 't gebouw bepleisterd. Daordeur bint de iezeroerblokken nie meer te zien.