Stonehenge
Stonehenge is en vöärhistorisk monument up de Vlakde van Salisbury in et engelske Wiltshire, sou'n 3 kilometer up et westen van Amesbury. Et monument is nen dübbelen kring rechtupstånde sandsteynene keien van ungeväär 4 meter houge un 2,1 meter breyd. De keien weaget ungeväär 25 ton. Se sint an de boavenkante med mekander verbünden med liggende steynder. Den binnensten kring förmet kleinere natuursteynder. Dårbinnen ståt vrye sou-nöömde trilitonen: twey loggere, rechtupstånde blükke van sandsteyn verbünden med mär eynen lattensteyn. Stonehenge is vervallen, mär is uutelynd richting de upkummende sünne by de summerse sünnewende.
Archeologen meynet dat Stonehenge tüsken 3000 töt 2000 vöär Kristus ebouwd is. Den ölderdom van den ümliggenden aerden kring un gröppe, wat by mekander de öldste fase van et bouwwark was, müt rund 3100 vöär Kristus anlegd weasen. Koalstofdatering gevt an dat de eyrste natuursteynder tüsken 2400 un 2200 vK upericht sint, al künnet se der good al vanaf 3000 vK henebracht weasen.
De grötste keien lyket uut West Woods sou'n 26 kilometer wyderup to kummen, den binnensten kring natuursteynder un den altaarsteyn kummet uut Wales (230 kilometer wyderup).
De britten seet Stonehenge as et vöärnaamste kulturele kenmark van öär land. Et steet seyd 1882 under monumentensküt, vanaf et ougenblik at de eyrste döärslaggeavende wetgeaving vöär historiske gedenkteykens in et Vereynigd Köäningryk der döär küm. Seyd 1986 steyt et ouk by up de wearldarvgoodlyste van UNESCO. Stonehenge höyrt de britske Kroune un wördt beheyrd döär English Heritage. Et ümliggende land höyrt de National Trust.
Wåras Stonehenge vöär deenden is neet düdelik. Nöäst en stearenkykerssteade un heylend centrum kan et ouk nen doudenakker eweasd hebben. Der sint butafsettingen vünden dee to dateren sint töt 3000 vK, do as de eyrste gröppe un wal anelegd wörden. Andere spoars düdet der up dat dat noch 500 jår sou bleav.
Naamherkumst bewark
In de Oxford English Dictionary steyt ne anhaling van Ælfric syne wöördelyste uut de 10. eywe, wårin henge-cliff as skarpen, rechtupstånden steyn wördt egeaven. In de 11. eywe wördt eskreaven oaver stanenges of Stanheng "neet wyd van Salisbury", wårmed "hangende steynder" wördt bedüüdt. Volgens Christopher Chippindale syn wark Stonehenge Complete kümt de name Stonehenge van oldengelsk stān (steyn) un of hencg (skarneer, engelsk: hinge, ümdat de liggende topsteynder 'skarneert' up de stånde steynder) of hen(c)en wat hangen kan bedüden.
Et woord 'henge' is up sikselv kummen to stån as andüding vöär vergelykbåre prehistoriske gedenksteynder.
Bouw bewark
Vöäle is der noch altyd undüdelik oaver Stonehenge. Dee wat et bouwden skreaven der neet by wårümme of wodöänig. Dat hevt to verskeidene volksverhalen leided.
De steynder ståt uutelynd up sünsundergang in et winter, un sünsupkumst in de summerse sünnewende. Et stükke land hyr leade al in de gode richting. Et kan weasen dat et em dårümme jüüst hyr must weasen. Der sint oaverblyvselen van eslachte deers evünden, wat kan andüden at lüde hyr vöäral vöär et winter kümmen un neet sou seyr vöär et summer. Toch blivt et wyders noch giswark.
Ouk de wyse wårup as de bouwlüde et anvatteden is neet geheyls düdelik. Lange wör emeynd at gewoane lüde sunder hülpmiddelen nooit sükke groute moppen van keien kunden versleapen. Dat leidden töt fantasyverhalen oaver butenaerdske hülpe of tydreisen. Toch is anetöynd at nen simpelen A-hefboum, selvs med prehistorisk materiaal, toch heyl wat gewicht in de höygde krigt.
De meyste kenners meynet at de keien vervoord sint döär se te rullen oaver ne bane van runde balkens. Ne andere warkwyse dee vöäle weatenskoppers underskryvet is ne årt sleyde den as voord etrökken wör oaver derenvet. Dat wör in 1995 al es med sukses beweysen kort by Stonehenge in de büürde, med ne keie van 40 ton. Ne grupe van 100 helpers drükkeden un tröäken de keie oaver ne strekke van 29 kilometer vanaf de Marlborough Downs.
Gebruuk bewark
Ouk wårvöär Stonehenge deenden is neet düdelik. Et mag weasen dat et ne stearenkykersteade is ofwal ne årt religiöös spül. In de 1960'er jåren beskreav Gerald Hawkins nauwköärig wo as Stonehenge uutkeyk up nen weaderkeyrigen kring van 56 jår vöär de sünne un måne.
Unlangs sint der twey nye teoryen uutedacht. Geoffrey Weinwright un Timothy Darvill meynden at Stonehenge en heylend centrum of bedevårtsoord eweasd kan hebben, ne vöärhistoriske versy van Lourdes. Volgens öär verklårt dat wårümme as der souvöäle vergroide of ungelükkige lüde begraeven ligget - dee meynden hyr beater to künnen worden. Mär ouk Weinwright un Darvill meynden at et wellicht vöär meyrere dinge togelyke bruked hevt eweasd, sou as anbidding van de vöärolden.
Uut undersöök blikt at wat van de begraevenen neet uut de nöägde kümmen. En jüngen neet vöäle ölder as 10 jår wat der rund 1550 vK begraeven wör, groiden up rund de Middellandse Sey. Nen metaalbewarker van 2300 vK, den as se den Boagskütter van Amesbury nömet, küm uut de düütske vöärhöävels van de Alpen. De "Boscombe Bowmen" kümmen wårskynlik uut Wales of et franske Bretanje.
Volgens Mike Parker Pearson was Stonehenge möägelikerwyse underdeyl van en grötter rituääl landskop, verbünden an Durrington Walls. Hee meynden, Durrington Walls Henge was ne steade vöär de leavenden un Stonehenge vöär de douden. Dan was ne rituäle reise langs de rivyr de Avon deyl van en oavergangs- of grovengebruuk van leaven når doud, üm de vöärolden un den verstörvenen to eyren. Beide teoryen beståt al seyd de 12. eywe, do as Geoffry van Monmouth de steynder heylende krachten toskreav un med et idee küm at Stonehenge ne ård gedenkteyken van gravsteynen was. Wyders meynt Parker Pearson at et en symbool vöär vreendskop en samenkumst eweasd kan weasen. Dat baseert hee up et idee dat in de tyd van den bouw vöäle van de vöärhistoriske volker in Groutbrittanie kultureel tohoupe kümmen.
Wat der ouk vöär teoryen beståt, et is düdelik at et uutlynt med de sünnewende. Dat kan to grundslag eleagen hebben an heyle religiöse gebruken.
Ouk untdekkeden undersökers van de Royal College of Art in Londen dat de natuursteynder "vrömde klankeygenskoppen" hebbet. A'j der up hauwt, klinkt der en hard galmend geluud. Sükke keien wordet vake vünden in de Carn Melyn-keaten van Presili. Et dörpke Presili van Maenclochog (Welsk vöär steynbelle) gebröäk disse natuursteynder töt in de 18. eywe as karkklokken. Dit is, meynt et koppel undersökers, wårümme de keien sou nen ende van de steade heisterd wörden, ne groute underneaming in dee tyd. In wat olde kulturen hebbet klinkende keien mystike of heylende krachten. Dat likt Darvill syne gedachte to understöänen dat Stonehenge en heylend centrum was.
Rechtevoord trekket et vöäral turisten, druiden un anhangers van ny heidendom.