Studìntenkörps

n Studìntenkörps of körtweegs körps (ook sjörps) (deur studìnten zulf as [koor] (schreven: corps) oetsproken) is n traditsjonele studìntenverainen dij maisttieds verbonden is aan n akademie. Ook mout man, om zokzölf offisjeel körps te nuimen maggen, aansloten wezen bie de ASG (Algemene Senaten Vergadering). Veur boetenders stoan korpora bekìnd as eliteklubs woar allìnd môr kakkers bie zitten. Dit is natuurlieks puur subjektief.

Ien Nederlaand binnen der negen offisjele korpora:

GSC Vindicat atque Polit - Grunnen stad, oprichten ien 1815 en doarmit de oldste van Nederlaand
LSV Minerva - Laaiden, oprichten ien 1839
USC - Oetrìcht, oprichten ien 1848. Allìnd veur manluu
DSC - Dèlft, oprichten ien 1848
ASC/AVSV - Amsterdaam, oprichten ien 1851
WSV Ceres - Woageningen, oprichten ien 1878
UVSV/NVVSU - Oetrìcht, oprichten ien 1899. Allìnd veur vraauwluu
RSC - Rötterdaam, oprichten ien 1913. Allìnd veur manluu
RVSV - Rötterdaam, oprichten ien 1915. Allìnd veur vraauwluu

Schiednis

t Eerste körps wör vörmd ien Stad ien 1815, môr veur t echte begun mout man trugge goan noar t openen van de Rieksakademie Grunnen, twijhonder joar eerder. Ien dij tied waren der helstersenoaten of groensenaten dij de studìnten behelsterden, woarnoa zai bie n ploug terecht kwammen noar heerkomst (pervìnzie) of fakulteit. Noa n schietinsidìnt op de Vismarkt, woarbie n studìnt deur n stadjer neerschoten wör, gongen dizze klaine plougkes zok verainen in wat tegenswoordeg Vindicat is. Zai wilden heur verainegen om soamen staark te stoan en as ain lichoam, ain orgoan heur rìchten te verdedegen. t Woord corps, platgrunnegs dus körps, komt van t Latainse woord corpus, wat lichoam betaikent. Noa Grunnen volgden ook de aander steden mit n studìntenkörps. Ien t begun wazzen zai apmoal schaaiden, manluu en vraauwluu apaart. Summege korpora binnen al gemengd, môr der binnen nog n poar dij schaaiden binnen.

Onderschaaid van aander verainens

Korpora kìnmaarken zok deur n hierarchie op leeftied, ook wel ancienniteit nuimd. As aine laanger lid is, krigt er meer rìchten. Dizze regels kinnen per körps verschillen. De eerstejoars leden hebben dus waaineg rìchten en worden voak aanduud as foet (oetsproak: [veut]). Bie korpora hest den ook nog behelstern. Pas noa dizze behelstern is dijgene volweerdeg lid. Ook hest n hail ìnde onschreven regels dij mores (enkelvold mos) nuimd worden.

Doarnoast is t toalbroeken ook typisch körpreel. Ien Grunnen hest den aigelks ook drij verschillende toalen. t Stadjeder Grunnegs, t Hollaands van de studìnten en t Studìntengrunnegs van de körprele studìnten.