Sunt-Jehannesge

Sunt-Jehannesge (Nederlaans: Sintjohannesga, Fries: Sint-Jansgea, in de volksmond Sint Jut) is een dörp in de gemiente De Friese Meren, in de Nederlaanse perveensie Frieslaand. Et dörp het omdebi'j 1.100 inwoners. Et beheurde tot 2014 tot de vroggere gemiente Scharsterlaand.

Ligging van Sunt-Jehannesge

Sunt-Jehannesge vormt eins een twielingdörp mit Rotsterhaule. De dörpen warken dan ok tegere op vule terreinen, zoas op et gebied van schoelen, karken en verienigings. Sunt-Jehannesge is vernuumd naor de karke in et dörp, die wijded is an de heilige Jehannes. Disse karke staot hier al jaoren niet meer. Wel staot d'r in de buurt nog een meulen: De Hersteller.

Hoe et komt weet gieniene, mar zoe'n veertig tot vieftig jaor leden woonden en warkten an de Streek in et twielingdörp wel tien verschillende bakkers. Tot een broodoorlog kwam et liekewel niet. Integendiel, ze orgeniseerden heur in een inkoopverieniging en ien keer per jaor gongen ze mit heur vrouwen een dag op stap. De meerste van die bakkeri'jen bin in de jaoren zestig verdwenen, mar de zaeken die overbleven hebben vaeke zo gek nog niet boerd. De koekfebriek van Sunt-Jehannesge, Wieger Ketellapper (onderdiel van Koninklijke Peijnenburg B.V.), is bekend in hiel Nederlaand, krek as de roggebroodfebriek van Van Dijk en in Rotsterhaule de koek- en peperneutefebriek van Modderman.