Tiem Evink

Tijmen (Tiem) Evink (Wilsum, 18 jannewaori 1918 - Kampen, 5 september 2009) was een Nederlaandse keunstschilder en musicus.

Jeugd

Evink wördden geboren in Wilsum, een dörpien an de Iessel in de destiedse gemiente Iesselmuden (tegenwoordig onderdiel van de gemiente Kampen). Hij was de oldste van zes kiender; zien volk waren de Wilsumer krudeniers Hendrik Evink en Johanna Riezebos. De femilie van zowal vaders- as moederskaante was muzikaal. Va Evink was mit-oprichter en dirigent van meziekverieniging Euphonia. Tiem tiekende en schilderde van jongs of an; hij bekwaamde hum deur in de maande te warken mit een köppel keunstenaars.

Ontwikkeling as schilder

't Wark van de Kamper schilder Henk Poeder (1897-1958) bewonderde hij, beveurbield hoe of Poeder riet wus te schildern. Riegelmaotig trökken ze der mit 'n beiden mit schetsboek en potlood op de motor of de fietse op uut. Thuus dienden de schetsen as basis veur eulievarfschilderijen. Evink maakte veural laandschoppen. Ok schilderde hij onderwarpen ontspreuten an de fantasie en warkte hij in opdracht. Behalve schilder was e musicus, koordirigent en meziek- en tiekenleraar.

Kampen

Op 14 febrewaori 1945 trouwde Evink in 't Grunningse Moarum mit Frouke (geboren Froukje) Botma uut Boerakker, toendertied in de gemiente Moarum. Jaorenlaank dreven de beiden in de Geerstraote in Kampen een keunsthandel annex liestenmakerije. Ok begunden ze daor reclamebureau Tijmeka (wat stund veur Tijmen Evink Kampen). Evink schreef teksten, etaleerde en schilderde reclames veur bedrieven. Lange tied was e dirigent van de kienderzang in Kampen op Keuninginnedag.

In 1974 maakte Evink een antal schilderijen van de dörpen in de gemiente Iesselmuden: Zalk, Kampervene, Wilsum, 's-Eerenbroek, Iesselmuden en Graffest. De serie wördden ekocht deur de Duutse partnerstad van de gemiente Iesselmuden, Meinerzhagen. De stad schunk ze vervolgens an de gemiente Iesselmuden, waor ze op 't gemientehuus hungen töt 't samengaon mit de gemiente Kampen in 2001.

De Evinks gungen vake mit vekaanse naor Amelaand, daor as ze een vekaansiewoning kochten. Evink organiseerde der (verkoop)tentoonstelings. Op latere leeftied begunde Frouke op andrang van Tiem te aquarelleren; ze illustreerde onder meer dichtbundels van Nel Benschop.

Tiem Evink aoverleed in 2009; Frouke Evink-Botma in 2017. Ze bint begraven op de algemiene begraafplaatse van Wilsum.

Bronnen

• Collectie Ameland: Tiem Evink
• SNS Historisch Centrum: Evink, Tijmen (Tiem)
• Wilsum in vrogger tied: Evink, Tiem (1918-2009).
• Weekblad de Brug, 9 april 2013 (Kamper neis- en advertentieblad)
• Wiewaswie.nl: hielijksakte

Zie ok

• Kamper Almanak: Levensbeschrieving van Tiem Evink deur Jaap van Gelderen (pdf)
• WalkateArchief: FWA zomertentoonstelling - Frouke Botma - Tiem Evink, een dubbelportret. - opnames in een YouTube-filmpien van wark van Tiem Evink en Frouke Evink-Botma

Dit artikel is eschreven in 't Zuudwest-Drèents.