Trolle

Kiek veur 't artikel aover smiesterig volk op internet hier: Trolle (internet).

Een trolle of trol (Oldnoors troll of tröll) is een wezen uut de Noordse mythologie en de latere Scandinavische folklore, in 't bezunder die van Noorwegen.

Kenmarken

't Begrip trolle is deur de tieden hen bried toe-epast. In de middelieuwen kun 't op netzölfde welk soort kwaod baovennetuurlijk wezen slaon. Typisch wördt trollen veuresteld as gevaorlijke, starke reuzen mit verholdingsgewies grote oren en neuzen en vier vingers an elke haand, die niet al te loek en niet best te passe bint. Ze kunt ok dwargachtig wezen, of nog aordig leep. Ok hebt ze niet altied de kop verkeerd.

Trollen leeft in de roege netuur, beveurbield in barggrotten, in bossen, onder de eerde of in zee. Deur heur verwevenheid mit de netuur belichaamt ze ok wal de netuurkrachten. Niet zelden bint 't dieven en ontvoert ze mèensenkiender, waorveur in de plaatse trollenkiender achtereleuten wördt. Ok bint ze in staot mèensen te eten.

Verwante wezens

In de Noordse mythologie waren trollen een soortement jötun, wezens waorvan de beschrieving per bron ok stark verschillen kan. In de mythologie van de Orkney- en Shetlandeilaanden hej een boosaordig of ondeugend wezen det trow(e) of drow het; dizze name is ofkomstig van 't woord troll. Trows hebt verscheiden kenmarken gemien mit trollen.

Bekendheid

Tiedens de Romantiek kwamen trollen vake naor veuren in Scandinavische vertellegies, schrieverije, keunst en meziek; daordeur bint ze wied en zied bekend eraakt. Ze koomt nogal ies veur in de moderne fantasy en rollenspullen. Bekende tiekenders van trollen waren de Noorse keunstenaars Theodor Kittelsen (1857–1914) en John Bauer (1882–1918).

Dit artikel is eschreven in 't Zuudwest-Drèents.