University of Austin
De University of Austin (UATX) is een op 8 november 2021 estichte[1] Amerikaanse universiteit in oprichting die veurnemens is een campus lös te doen in of bij Austin, Texas.[2]
_(cropped).jpg)
In een bericht in Bari Weiss heur neisbrief 'Common Sense' schetste Pano Kanelos, heufd van de neie universiteit, een bield van vrijheid van mieningsuting die onder drok zol staon op de bestaonde universiteiten van 't laand. Onder epeilde academici en studenten, schrif e, is der veule steun veur 't stillekriegen of deruutwarken van onderwiezers en studenten die niet as politiek correct wördt eziene. Ok mient e det universiteiten, um heur voortbestaon en imago te bescharmen, al hoe meer middeln besteedt an zaken die niet mitiene mit onderwies van doen hebt.[3] De universiteit in oprichting wil daorumme dreien um vrijheid van onderzuuk, gewetensvrijheid en 't vrije debat.[4] De universiteit is nog niet erkend deur een accreditatie-instelling, mar zuukt die erkennige wal.[5]
An de University of Austin hebt heur een hiele riege peblieke intellectuelen verbunden. De oprichtende bestuurders bint veurmaolig heufd van St. John's College Pano Kanelos, geschiedkundige Niall Ferguson, journaliste Bari Weiss, biologe Heather Heying en ondernemer Joe Lonsdale. In de raod van bestuur zit onder aandern academica en veurmaolig politica Ayaan Hirsi Ali, economist Glenn Loury, psycholoog Steven Pinker, onderzuker Lex Fridman, sociale psycholoog Jonathan Haidt en schriever Andrew Sullivan. An 't onderwiesprogramma wördt ewarkt deur filosoof en schriever Peter Boghossian, Ayaan Hirsi Ali en filosofe en schriefster Kathleen Stock.[6]
De universiteit in oprichting hef nog aordig wat stof doen opweien, waorbij der zowal ekeken wördt naor de ideologie van de betrökkenen as naor de vraoge of de ambitieuze plannen wal uutevoerd kunt wörden.[7]
Rifferenties
bewark- ↑ Webstee van de University of Austin: News & Updates, eraodpleegd op 12 november 2021
- ↑ Webstee van de University of Austin: Frequently Asked Questions, eraodpleegd op 12 november 2021
- ↑ 'We Can't Wait for Universities to Fix Themselves. So We're Starting a New One.' deur Palo Kanelos, in de neisletter 'Common Sense with Bari Weiss' op Substack, eraodpleegd op 12 november 2021
- ↑ Webstee van de University of Austin: Frequently Asked Questions, eraodpleegd op 12 november 2021
- ↑ Texas Standard: 'What we know about the University of Austin' deur Laura Rice en Glorie G. Martinez, 11 november 2021, eraodpleegd op 12 november 2021
- ↑ Veurziede van de webstee van de University of Texas, eraodpleegd op 12 november 2021
- ↑ The New Republic: 'Do We Really Need an Anti-Woke University?' deur Alex Shephard, 8 november 2021, eraodpleegd op 12 november 2021
|
Dit artikel is eschreven in 't Zuudwest-Drèents. |