Verköldheid
|
WIKIPEDIA kan der nit vöär instån dat de inhold van artikels kloppet. As jy wat mankeret, kün jy et beste eaven by een dokter angån. |
Verkeuldheaid of akute virale nasofaryngitis is ne infeksie duur n rhino- of koronavirus van de böawnste lochtweagn (neuze en n haals).
klachten köant wean: proostn, lekneuze, dichte neuze, haalszearte, hoostn, kopzearte, lamleandigheaid. Mangs kriegnt leu rode, jökkerige oogne (beendvleesonsteking). Leu dee't verkeuldn zeent hoowt meestal nit in berre te bliewn en köant gewoon alns doon wat ze normaalgesprökn ook doot. Meestal doert ne verkeuldheaid vief töt zeuwn deage, mangs töt twee wekn. Verkeuldheaid is de meest vuurkomnde infeksie bie leu; duur mekoar zo twee töt vere per joar bie volgröaidn. Skolegoande wichter köant mangs 12 keer in t joar verkeuldn wean. De beste manere um verkeuldheaid teegn te goan is de haande te wasken.[1]
Noa ne verkeuldheaid is n meanske vuur t leawn besteandig teegn det ofzeunderlike virus. Dr zeent skoonwal hoonderden verskilnde soortn verkeuldheaidsvirusse. De meeste doarvan zeent rhinovirusse, mer dr zeent ook aandere besmetters, zo as t koronavirus, para-griepvirusse, Syncyteel lochtweagnvirus, adenovirusse, enterovirusse en t metapneumovirus.
n Naam löt deankn at verkeuldheaid van keulte keump,[2] mer det is nooit weetnskoppelik an eteund.[3][4] t Mut wal ezegd wordn at verkeuldheaid vuural n weenterdag vuurkeump en bie koold wear of reagn. Dit kan dr ook gewoon met te maakn hebn at de leu dan mear binn (bie mekoar) zitt en de roetn meender lös hebt, woerduur't de leu mekoar völle earder anstekt. Ne vuuroonderstelling is det bloodvaatn in de heugere lochtweagn zik duur keulte dichter kniept, woerduur't t ofwearsysteem nit good woarket.[5]
Ondaanks at medisienfabrikaantn[6][7][8] en alternatieve geneaswiezen[9][10] aanders beweart, hef geneaskeundig oonderzeuk nooit oet eweezn[11][12] at verkeuldheaid duur geneasmiddeln kan vuurkomn wordn of teegn egoan. De klachtn köant dr wal met teegn wordn egoan, mer t is nit zeker of de verkeuldheaid dr körter van doert.
Aander oonderzeuk wis oet at verkeuldheaid wellicht saamngeet met dikheaid. De stoatistiekn wordt nog wier beïnvloodt duurdet dikke leu duur mekoar enömn vakerder noar n dokter goat vuur kleaine klachtn. Ook hebt dikkere leu duur mekoar meender wierstaand as leu van "normale" zwöarte.[13]