Veurlopen

Veurlopen is n paranormaal verschiensel dat vrouger veul veurkwam ien de Saksische en Fraise gebieden. Vrouger leufen mennege luu ien dizze gebieden dat dit echt was. t Verschiensel holdt ien dat man n "visioen" (toukomstbeeld) zag, dus man vernam wat, veurdat t echt gebeurde. Dit kon wezen ien vörm van lichten of geluden, mor bieveurbeeld ook symbolen. Zo ston n hoelende hond veur dood. As aine n vrumde, hoelende hond over t veld zag, betaikende dat voak dat der aine oet tied kommen zol. n Rooie hemel betaikende oorlog of n aander oprour, môr maisttieds zagen mìnzen dingen, voak lichten of zo wat, woar loater n autoweeg lègd is of n hoes baauwd is.

Man nuimt dit ook wel "helderziendheid" (kloarzicht). Der binnen mennege verhoalen van luu dij vrouger schienboar dizze goave haren. Luu dij dit haren, doarvan wör ook wel zegd dat zai mit helm op geboren wazzen. Sumtieds wör t zain as wat duvels en sumtieds was t juust wat positiefs.

Deur kultuur- en religiewaitenschoppers wordt t ook wel aanduud as "bijgeloof" en as haidens overbliefsel.

Bie aander volker kent man dit ook. Zo broeken zigeuners n gloazen bol om ien tou kieken. De Inka's broeken bloader. De Maya gebroekten halluzenerende plaanten en paddestoulen en heur op de steerns bazeerde klinder. Bie tarot worden koarten broekt en ien astrologie wordt keken noar de staand van steerns en planeten. Aander luu zain veurlopens ien heur dreums of ien swaarde spaigels. Summege luu hebben der zulfs heur beroup van mokt, om aander luu heur toukomst tou veurspellen.

Toch binnen "veurlopen" en "veurspellen" nait hailmoal t zulfde. Bie veurspellen dut aine zien best om de toukomst tou zain, ien tieds dat veurlopens oet zokzulf verschienen.

t Probleem mit veurzain is dat t mennegmoal klopt, mor t is noeit waitenschoppelk bewezen hou of t waarkt en of t uberhaupt echt is. Tegenswoordeg leuven lutje luu dat t echt is.

Dit artikel is noch maar en beginnetje. Help mid döär et uut to breiden.