Vlagge van Gelderlaand

De vlagge van Gelderlaand is ne horizontoale dreekleure in de kleuren (vanof boaven) blauw, geal en zwart. De vlagge wodden op 15 april 1953 deur Previnsiaole Stoaten vast-esteld.

Vlagge van Gelderlaand (ratio 9:13; de facto 2:3)

Et zinnebeeldegen

De dree kleuren bunt of-eleid van et woapen van Gelderlaand. Dit woapen teunt n schild dat wöd edroagen deur twee leeuwen. De linkerhelfte van et schild teunt den golden leeuw den in ne latere uutvoering van et woapen van et Hartogdom Gelre op n blauw schild stoand. De rechterhelfte hef den zwarten leeuwe van Gulik, den vanof de 14de eeuwe ok deel uutmek van et Gelderse woapen, umdat de hartoagen van Gulik et gezag oaver Gelre verkreagen. Dizzen leeuw wöd op nen golden achtergroand weer-egoaven. De dree kleuren blauw, gold (geal) en zwart staot dus centroal in et Gelderse woapen en bunt doarumme de Gelderse kleuren.

Untwarp

De heugte-breedteverholding is officieel 9:13, ne ungebrukeleke verholding. In de praktiek holdt zi-j mangs de gebrukelekere verholding van 2:3 an, dee ok van toopassing is op de Nederlandse vlagge.

Alle dree de banen nemt n darde van de heugte in.

Geskiednis

In de rundumme eerste 15 joar noa den Tweeden wealdkrieg gingen de Nederlandse previnsies eure vlaggen anneamen. De previnsie Gelderlaand wol op groand van et previnsiewoapen ne blauw-geal-zwarte vlagge, mit nen hartoghood op de geale middenbane. Dee mös et olde hartogdom Gelre zinnebeelden, woaran de previnsie zienen name hef ontleend. Den Hogen Road van Adel was echter teggen de opnaome van nen veurstelling op de dreekleure, woarnoa de vlagge van vandage is an-enommen.

De vlagge wodden op 15 april 1953 an-enommen deur middel van de uutgave van et vlagbesluut in et Previnsioal Blad van Gelderlaand. Et untwarp kon op algemeane instemming rekkenen van de leaden van de Previnsioale Stoaten.