Volodymyr Selensky

Volodymyr Oleksandrovitsj Selensky (ukrainsk: Володимир Олександрович Зеленський; 25. january 1978 in Krywyj Rih, de ukrainske SSR, Sovjetuny) is den sesden un hüdigen ukrainsken president seyd 2019. Synen ambtstyd wördt groutendeyls bepåld döär den oorlog van Rusland med Ukraine, den as begün in february 2022.

Staatsyportret van Volodymyr Selensky in traditionäle ukrainske kleyder

Leaven & loupbane

As söäne van en russisk-spreakend ukrainsk-jöädsk gesin groiden Selensky up in Kryvyi Rih, ne groute stad in Dnipropetrovsk Oblast in midden-Ukraine. Hee studeerden af in de rechten an et Ekonomisk Instituut van Kryvyi Rih, mär is nooit advokåt weasd. In steade dårvan begün hee to warken as komik un in de vermaakindustry. Hee richteden et produktybedryv Kvartal 95 up, wat films, teykenfilms un TV-ryges makeden. Eyne van dee series was Servant of the People, wårin as Selensky spöälden dat he ukrainsk president was. De sery löyp van 2015 töt 2019 un was slim populäär. Määrt 2018 stichteden medwarkers van Kvartal 95 ne echte politike partye med deselvde name.

Presidentskap

Up den 31. december 2018 kundigden Selensky an at he med solde doon an de verkesingen van 2019. Et wör togelyke uutesünden as de nyjårstospråke van domålig president Petro Porosjenko up kanaal 1+1. As politiken butenstånder stünd hee al månden as eyne van de favoriten in de peilingen. Hee wün de verkesingen med 73,23% van de stemmen in de tweyde runde, de grötste oaverwinning in de geskedenisse van Ukraines presidentiäle verkesingen.

Selensky hevt sikselv upewörpen as teagen de västigde orde un teagen ümköypbårheid. As president hevt he sik der hard vöär emaked at der meyr online med de regeyring to regelen was, un dat spreakers van et ukrainsk un russisk meyr by mekander kümmen. Hee is selv heyl druk up sociale media, vöäral Instagram. Under Selensky is der de unskendbårheid vöär leaden van et parlement achterhen egån (de Verchovna Rada) un hee hevt sik inesat üm de COVID-19-pandemy un dårupvolgende recessy to beheyrsken. Ouk hevt he wat vöäruutgang eboked med teagengån van ümkoupbårheid. Uut ne peiling in mei 2021 van Rating Group kreag Selensky et höygste cyfer wat vertrouwen angeyt, un hee wör nå Leonid Kuchma seen as den eyn-nå-besten president.

Oorlog med Rusland

In syne presidentskampagne beloavden Selensky üm et stille verskel med Rusland up to lössen. Syne gesprekken med den russisken president Vladimir Putin haalden neet vöäle uut. Syne regeyring kreag to maken med voordan gröttere spanningen med Rusland in 2021, med as resultaat dat Rusland in february 2022 Ukraine heylemål binnenvöl un wat noch altyd neet upelösd is. Selensky bleav de ukrainers voordan seggen händig an to doon un de internationale gemeynskap verseakeren dat Ukraine neet sol terügge hauwen. Eyrst nöäm he afstand van wårskouwingen dat der nen oorlog an sat to kummen terwyl as he medeyne militäre hülpe inskakelden van de NAVO üm de dreiging teagen to gån.

Do as Rusland de invasy upsatteden, bleav Selensky in Kyiv. Anböde üm em to evakueren slöög he af. Hee rööp de noudtostand uut vöär et heyle Ukraine un ne algeheyle mobilisaty van de strydkrachten. In 2022 wör Selensky Persoon van et Jår by et blad Time. Hee besöcht regelmåtig et front un bevryde gebeden. Up vöäle oapenbåre saken verskynt he ungesköären un in en nen grönen militäär-achtigen trui.

Selensky synen ambtstyd solde der in mei 2024 upsitten, mär den anblyvenden oorlog med Rusland un de noudtostand blokkeert nye presidentsverkesingen. Der wördt algemeyn anenöämen dat hee anblivt sou lange as den oorlog duurt. Döär disse unverwachtse verlänging is Selensky den eyn-nå-längst sittenden president van Ukraine, nå Kuchma.

Persöönlik

In 2003 trouwden Selensky med syne skoolvreendinne Olena Kijasjko. Med öär hevt he twey wichter; dochter Oleksandra un söäne Kyrylo.