Westerdaipsterdale

Westerdaipsterdale is n buurtschop in de gemainte Veendaam, pervinzie Grunnen. De buurtschop ligt ten westen van Wildervank, aan n doodlopende, onverhaarde weg vanòf de Kielsterachterweg. De postadressen van Westerdaipsterdale valen onder t dörp Wildervank. Mit bloots twij hoezen is Westerdaipsterdale t klaainste dörp van Nederland. In t vleden stonden der zes hoezen, mor in verbaand mit de ruilverkoaveln binnen vaaier hoezen òfbroken. De buurtschop kwam in 1984 in t Guiness Book of Records as klaainste ploats in Nederland, omreden dat der doudestieds bloots ain inwoner was. Op t heden is ook t twijde hoes bewoond en binnen der vief inwoners.

In 2007 komt Westerdaipsterdale in t nijs as 'Asterix en Obelixdörp' as d'inwoners n miljounenprejekt aangoande n voarverbinden tussen Veendam en t Zuudloardermeer waiten te onderbreken. De bewoners verzetten zoch tegen d'aanleg van n nije voart en de kap van 120 bomen. Volgens heur zollen veul van de bomen meer as 40 joar old wezen en zol deur de kap van dizze bomen t oetzicht bedurven worden. t Prejekt wer oetsteld, mor loater is de voart toch aanlegd en binnen de bomen ook kapt. In 2009 was t Westerdaipsterdalkenoal kloar. Dit kenoal verbindt t Langebosschemeer in t westen van Wildervank mit t Kieldaip dat deur Kiel-Windeweer lopt. Hiermit is Veendam aansloten op de rekreoatieve voarverbinden tussen Oost-Grunnen en t Zuidlaardermeer.

Noamverkloaren

Volgens t bouk Nederlandse plaatsnamen verklaard van Gerald van Berkel (2017) is dale (Nederlands: dallen) n benoamen veur òfgeveende gronden dij nog nait in kultuur brocht binnen. Doarom wordt aannomen dat dizze noam wist op n laankdureg bestoan van dizze overgangssituoatsie tussen veengroaverij en lanbaauw.. Zo wordt t leste dail in de noam van Wildervanksterdale (gelegen aan aanderkaant Wildervank) verkloard. Aannomen wordt dat dit ook geldt veur Westerdaipsterdale. t Westerdaip is t knoal dat aan de westkaant in Wildervank lopt.

Westerdaipsterdale in de Grunneger meziek

Op Erwin de Vries zien album Aigenhaimer (2006) staait t nummer Wies mie de weg noar Westerdaipsedalen.

Jan Henk de Groot het zien album Keunenk van Westerdaipsterdale (2016) opnomen bie Bonney Brattinga, dij in 1984 d'ainegste bewoner van Westerdaipsterdale was. De tuddel van t album is n eerbetoon aan Brattinga, net as t van dit album òfkomstege nummer Bonney. Bie t nummer Evenwicht, ook van dit album, is n videoclip opnomen mit beelden van Westerdaipsedale.

De Vries en De Groot bruken nait dezulfde schriefwieze veur de ploatsnoam. In de Grunneger woordenbouken wordt de ploats nait nuimd. Volgens t Groninger Zakwoordenboek van perf. dr. Siemon Reker wordt de noam Wildervanksterdallen in t Grunnegs slichtweg vertoald as Dale. Doaruut kin je opmoaken dat Westerdaipsterdale de juuste schriefwieze wezen zel.