Ab Drijver

Aaldert (Ab) Drijver (Assen, 29 april 1944) is een Drèentse verslaggever, zanger en schriever die hum ok inezet hef veur 't Drèents.

Journalistiek wark

Nao een riege baanties warkte Drijver as journalist bij de bladen van de Drents Groningse Pers. Tien jaor laank was e coördinator, interviewer en recensent van de streektaalbladziede van de DGP-bladen. Drèentstalige columns van hum verschenen onder de name Aoldert van Geesie. Onder dizze name was e ok riegelmaotig veur Radio Drenthe. Wieder schreef e opiniërende stokken veur 't Algemeen Handelsblad.

Muzikale carrière

In 1963 wun Drijver 't Amateur TT-Festival; in militaire dienst raakten e bekend as De zingende militair. Hij zung in 't Duo Nimbus, 't Moorland Trio, 't Moorland Kwartet en Resound. As Bob Driver zunk e veureerst in 't Nederlaands en Engels. In 1980 richtten e de country- en westerngroep Nashville Express op.

Vanof 1970 legt Drijver hum toe op 't Drèentstalige lied; hij gebruukt teksten van onder meer Roel Reijntjes en Frans Westenbrink. In 1985 wördden e op 't Drents liedjesfestival begeleid deur de groep Toermalijn uut Assen. Sinds 2006 treedt e samen op mit Janke Lameris.

Schrieverije

Drèentstalige verhalen van hum stunden in letterkundig tiedschrift Roet; ok wördden der verhalen en gedichten van hum in bloemlezings openeumen. Zien tenielstok Het wichie dat te veul geluk har (1991) leverde openhartige kritiek op de mitgaondheid van veul Drèenten in de Tweede Wereldoorlog. Zien Drèentstalige wark is nog niet bij mekare ebracht.

Discografie

• Seizoenen (lp, 1974)
• Songbird (lp, 1980)
• Zolang er leven is (lp, 1986)
• Ab Drijver (cd, Drèentstalig, 1990)
• Luster naor de radio (cd, mit aandern, 1991)
• Girrelzaand (cd, mit aandern, 1993)
• 10 jaar Radio Drenthe (cd, mit aandern)
• Vanneis (cd, mit aandern)
• Altied in de buurt (cd, mit aandern, 2002)

Publicaties

• De nieuwe dag in gouden glans (1981)
• Wat wilde ik ook weer zeggen? (gedichten, Zuudwolde, 1982, Nederlaandstalig, 1982)
• Assen Anno; het boek bij de film (1983)
• Een wereld die voorbij ging. Kinderen van de vorige eeuw vertellen over hun jeugd in Drenthe (Zuudwolde, 1985)
• Van boekenkist tot beeldscherm (1988)

Bronnen

• Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 147-8)
• Streektaalzang.nl aover Ab Drijver

Uutgaonde verwiezings

• Lied 'De Helterbult' deur Ab Drijver, ebaseerd op Grietje Clewits heur gedicht 'd'Elterbult'

Dit artikel is eschreven in 't Zuudwest-Drèents.