Een bardische name (Welsh: enw barddol), Cornisch: hanow bardhek) is een pseudoniem det in Wales, Cornwall en Bretagne wal gebruukt wördt deur dichters en aandere keunstenaars. Bardische namen bint veural in gebruuk onder lu die betrökken bint bij de bewegingen veur de Keltische talen en culturen van det laand en die gebieden.

Oorsprong bewark

't Keltische woord bard (dichter) verwees eerst naor de Welshe dichters van de middelieuwen, die mangs rondtrökken en mangs bij 't huusholden van een edele heurden. Der waren der die bekendstuden onder pseudoniem, zoas Cynddelw Brydydd Mawr (Cynddelw de Meister-dichter), warkzaam tussen 1155 en 1200, en Iolo Goch (Iolo de Rooie), c. 1320 – c. 1398. 't Bardschop lek aordig old te wezen; zo nuumt de Welshe geschiedkundige Nennius zesde-ieuwse bards as Talhaearn Tad Awen, Blwchfardd, Culfardd, Taliesin en Aneirin.

Umdet achternamen in Wales vake patroniemen bint, zoas Evans en Williams, dielt een bulte mèensen een beparkt antal achternamen. 't Was mit ok um heurzölf van gelieknamigen te onderscheiden det sommige dichters een bardische name keuzen. De 19de-ieuwse dichter John Jones naamp daorumme een bardische name an, Talhaiarn (naor zien geboorteplaatse).

Heropleving bewark

't Annemen van een bardische name kwaamp weer in zwang mit det de Welshe antiquariaat Iolo Morganwg in de 18de ieuw de middelieuwse tredisie nei leven inbleus. 't Gebruuk breidde hum ok uut naor Bretagne en Cornwall. In Cornwall wördt der naor sommige pioniers van de Cornische taalbeweging verwezen mit heur bardische name, zoas Mordon veur Robert Morton Nance en Talek veur E. G. Retallack Hooper.

Soortementen bardische name bewark

De Welshe domeneer en schriever Joseph Harris (Gomer) haalde zien bardische name uut de Biebel. Nog aandern gebruukt heur dichterlijke inspiratie, zoas de Welshe dichter Ellis Humphrey Evans (Hedd Wyn, oftewal Pure Vrede).

Een bardische name kan diel uutmaken van een eerbetoon, zoas wanneer de Gorsedh Kernow, de organisatie veur 't Keltische kerakter van Cornwall, iene 't bardschop verlient. Ie kiest dan een bardische name.

  Dit stok is eschreven in 't Zuudwest-Drèents.