Bargerveen

Bargerveen is een natuurgebied in de gemiente Emmen en lig an de oostelijke kante van de straote tussen Klazienaveen en Weiteveen. Het hef een oppervlakte van 2100 bunder en bestiet veur een groot deel uut hoogveen. Bargerveen is een overbleem stuk van het vroggere Boertanger Moor.

Kaorte van het gebied

Omschrieving

Meerstalblok in Bargerveen

Bargerveen bestiet uut drie delen: in het noordelijke deel hej het Meerstalblok, in het middenste het Amsterdamsche Veld en in het zuuden het Schoonebeekerveld. In 1992 bennen ze hier stopt met de vervening en kwam het gebied in hàanden van Staotsbosbeheer dat hier al verschillende stukken in zien bezit haar. Het Meerstalblok hadden ze het vrogste en later kwamen daor de twee andere stukken bij. Sins juni 2006 maakt het samen met het Duutse stuk het Internationale Natuurpark Boertanger Moor-Bargerveen uut.

Tiedens de vervening wuur het veen tot en met de jaoren dertig over het smalspoor naor de fabriek van de Griendtsveen Turfstrooisel Maatschappij in Amsterdamscheveld toebracht, waornao der van de boomste laoge, de bolster, turfstrooisel maakt wuur. Later gebruukten ze daor vrachtwagens veur. Waor vrogger de fabriek stun, hem ze sins 1984 het Industrieel Smalspoor Museum staon. Van de zwarte turf maken ze sins 1921 bij de Purit in Klazienaveen pillegies tegen de schieterij. Die fabriek wordt sins 1997 Norit Nederland nuumt.

Ze wullen in het natuurgebied datter weer opnij leemd hoogveen opkomp. Ze plàanten deurumme veenmos waoruut nao een poosie weer nei veen ontstiet.

Deur het Amsterdamsche Veld löp de Hondsrug nog een stukkie deur, waordeur je op de oostelijke helfte een redelijk dreug heideveld hem en de boel an de westelijke kante zun beetie verzup. Verder hem ze op verschillende plaatsen dammen bouwt met daordeur een hoog- en laagwatergruppe waor ze de waterstand met in bedwang holen.

In Bargerveen hej allerlei looproutes en kuj onderweg bijveurbeeld het Huusie van Uneken zien die ze niet afbreuken hem. Verder vi'j der een bulte verschilde planten en dieren en ister zelfs een speciaal adderveld anlegd. Het Bargerveen valt onder wat ze de Vogel- als de Habitatrichtlijn numen.

Bekieks

• 
  Kunstwerk uut 2006
• 
  Uutloper van de Hondsrug
• 
  Amsterdamsche Veld
• 
  Overbleem turfwagens
• 
  Meerstalblok
• 
  Meerstalblok
• 
  Meerstalblok
• 
  Meerstalblok

Commons: Bargerveen - plaatjes, filmkes en/of gelüüdsbestanden.

Dit artikel is skreaven in et drentsk.