Staotsbosbeheer

bos- en netuurbeheerder in Nederlaand

Staotsbosbeheer is de grootste bos- en netuurbeheerder in Nederlaand. In opdracht van de rieksaoverheid, mar veur een groot part bekostigd mit centerije van de pervincies en eigen inkomsten, beheert de orgenisaotie zo'n 270.000 bunder bos-, netuur- en dieverdaotsiegebied. Wieder hef Staotsbosbeheer zörg veur en verhuurt gebouwen in de beheerde gebieden. 't Heufdketoor zat töt 1990 in Utrecht, daornao in Dreibargen en sinds 2016 huzeert ze in Amersfoort. In 2018 hadden ze roem 1200 betaalde mitwarkers en meer as 7000 vrijwilligers.

Bezukerscentrum Drèents-Friese Wold van Staotsbosbeheer in Appelsche

DoelstellingsBewarken

De doelstellings van Staotsbosbeheer bint:

  • In staand holden, herstellen en ontwikkeln van bossen, netuurgebieden en 't laandschop in de beheerde gebieden
  • Dieverdaotsie in zoveule van de beheerde gebieden as meugelk anfietern
  • Bijdragen an de perductie van milieuvrundelijke en verneibere grondstoffen, zoas holt[1]

Naost bosbeheer bint netuurbeheer en laandschopsbehold in 't laandelijk gebied belangrieke taken. Veule andacht giet uut naor de dieverdaotsiefunctie van bos, netuur en laandschop. Daorumme bint der in de beheerde gebieden die daorveur geschikt bint kuier-, fiets- en kanoroutes, bezukerscentra, netuurkampeerterreinen, zwömgelegenheden, surfstraanden en watersportsteigers.

GeschiedenisBewarken

Staotsbosbeheer wördden in 1899 opericht um op weust laand bossen te ontwikkeln veur perductiedoeleinden (bosbouw) en um zaandverstoevings tegen te gaon. 't Kootwiekerzaand, een stoefzaandgebied op de Veluwe, was daorumme ien van de eerste gebieden die in beheer egeven wördden.

In 1997 hef de aoverheid de orgenisaotie zölfstaandig emeuken. Töt die tied völt Staotsbosbeheer direct onder 't Ministerie van Laandbouw, Netuur en Voedselkwaliteit. Onder de noemer 'Butenlèvend' verhuurt ze vroggere boswachterswonings, warkschuren en boerenspillen as vekaansiewonings.

As reactie op bezunigings deur de aoverheid is Staotsbosbeheer in 2013 begund mit de verkoop van wat terreinen. Niet lange daornao besleut de staotssikketaoris van Laandbouw det det niet de bedoeling was.[2] In 2019 warkte Staotsbosbeheer, um een doelmaotig netuurbeleid te voeren, mit an 't verbuten, kopen en verkopen van laand in verscheiden pervincies.

Bij veul activiteiten warkt Staotsbosbeheer in de maande mit aandere orgenisaoties en commerciële partijen. In 2019 wördden Shell anetrökken as sponsor. De energiemaotschoppije mut bijdragen an de kosten van neiplaant die neudig is nao 't roon van perductiebossen mit essen vanwege essentakkestarfte.

RifferentiesBewarken

  1. Staotsbosbeheer, dossier Bos en hout
  2. Dagblad Tubantia, Verkoop van natuurtgebieden door Staatsbosbeheer definitief van de baan, 30 jannewaori 2014

Uutgaonde verwiezingsBewarken


  Commons: Staotsbosbeheer - plaatjes, filmkes en/of gelüüdsbestanden.
  Dit artikel is eschreven in 't Zuudwest-Drèents.