Bels

Een bels (of-eleid van: Belgisch) is een iezig staark en zwaor ebouwd peerdenras dat ofkomstig is uut de West-Braobanse streek van België.

Een bels

Tiejens de Romeinse bezetting van 't gebied dat noen België heet, werd de bels al eneumd. Van de 11e tot de 16e eeuw werd de bels gebruukt as oorlogspeerd in Braobant en Vlaanderen. Daornao werd de bels gebruukt um zwaore waarktugen te trekken op 't platteland, in de mienbouw en in de haven. Oek trökken ze (post)koetsen en schepen.

In 1886 werd 't stamboek van de "Sociëteit van het Belgisch Trekpaard" op-ericht. In 1910 werden oengeveer 35.000 belzen vanuut België uut-evoerd naor Amerika, Kanneda, Ruslaand, Zweden, Duutsland, Frankriek, Groot-Brittannië, Nederland en Italië um de daor anwezige peerden te verbeteren, zoas de shire in Groot-Brittannië.

In 1950 waren der nog oengeveer 200.000 belzen in België.

Deur de moterisering nao de Tweede Wereldoorlog werden de belzen overbeujig. In 1980 waren der nog mar 6.000 belzen over. Een antal fokkers gung zich inzetten um dit peerdenras te behouwen. En in 2004 waren der oengeveer 12.000 belzen. Ze worren tegesworig gebruukt um te mennen. Veul van disse peerdenfokkeriejen bin te vienen in 't Pejottenland. Ter naogedachtenis van disse fokkers staon der in de daarpen Vollezele (Galmaarden) en Sint Kwintens Lennik (Lennik) standbeelden.

Uterlijk

De bels het een schoftheugt van oengeveer 1,70 meter. 't Peerd het een vrie kleine kop mit een korte, zwaore hals en een dubbele manenkam. 't Lief is krachtig en edröngen. De benen bin kort en stark mit an de koegels extra behaoring.

't Is gebrukelijk de start van belzen te couperen. Disse gewoonte is ontstaon umdat boeren vrogger op de akkers vaak vlak achter 't peerd naost de ploeg leupen en niet wouwen dat 't peerd de leidsels mit de start vast tegen d'r billen zouwen klemmen en zo veerdere besturing oenmeugelijk zouwen maken.

Der bin zeuven kleurslagen meugelijk bie de bels: bruun, zwart, vos, bruunschimmel, blauwschimmel, vosschimmel en appelschimmel. Sommige van disse kleuren bin zeldzaam.

Commons: Bels - plaatjes, filmkes en/of gelüüdsbestanden.

Disse pagina is eschreven in 't Putters