Billy's Boots

Britse voetbalstrip

Billy's Boots (in Nederlaand uutegeven as De wondersloffen van Sjakie) was een Britse voetbalstrip, veur 't eerst verschenen in 1970, deur scenarist Fred Baker en mit as veurnaamste tiekenders respectievelijk John Gillatt en (vanof 1988) Mike Western. De strip giet aover een jonge van een jaor of twalef, Billy Dane (in Nederlaand: Sjakie Meulemans), die bij zien opoe woont en alderbarsens geern voetbalt, mar niet al te best is. As e op een dag de zolder opruumt, viendt hij een paar olde kicksen die van een held van hum waren, de anvaller Charles 'Dead Shot' Keen (in Nederlaand: Voltreffer Vick). Wanneer Billy dizze schienbaar magische voetbalschoenen drag, speult e de steerns van de hemel en wet e zien schoelteam in toernooien naor de aoverwinning te voeren.

In de loop van zien aoventuren rak Billy de olde schoenen nogal ies kwiet of gaot ze kepot, en mut e ze weerummevienden of laoten oplappen. Hij les ok algedurig stokken uut een biografie aover Dead Shot Keen, waornao der vergeliekbere dingen in zien eigen leven gebeurt. Wanneer der niet evoetbald wördt, speult Billy cricket; ok dit döt e beter op een stel olde cricketschoenen van Dead Shot Keen. Allewal de strip miest um voetbal dreit, gaot sommige verhalen aover aandere aspecten van Billy zien leven, zoas wanneer zien opoe in 't ziekenhuus kump en hij naor een tehuus mut. Vake giet 't ok aover hoe 't voetbal van invloed is op Billy's vrundschoppen mit schoelkammeraoden.

Gillatt en Western gebruukten elk een kats eigen stiel, waordeur 't uterlijk van Billy verschilt ofhaankelijk van de tiekender. Naost John Gillatt en Mike Western hebt tiekenders as Ron Turner, Ian Kennedy, Barrie Mitchell, Colin Page en Tom Kerr an de strip ewarkt.

VerschieningBewarken

Een veurloper van de riege was 't gelieknamige Billy's Boots, een humoristische strip die deur Frank Purcell eschreven en etiekend wördden en van 1961 töt 1963 in stripblad Tiger stund. 't Verhaal was vergeliekber mit de latere, meer serieuze strip. Dizze leste verscheen veur 't eerst in 1970 in voetbalstripblad Scorcher (vanof 1971: Scorcher and Score). Toen det blad in 1974 samengunk mit 't blad Tiger, gunk de strip wieder in Tiger. In 1985 gunk Tiger samen mit 't blad Eagle en kwaamp Billy's Boots vanneis mit. 't Aandere jaor verhuusde de riege naor weekblad Roy of the Rovers. In 1990 wördden det Best of Roy of the Rovers Monthly. Neie ofleverings van Billy's Boots verschenen töt 1993. De Britse bladen daor as de strip in stund, waren vake op goedkoop pepier edrokt en diels in kleur, diels zwart-wit.

De riege in aandere laandenBewarken

Allewal Billy's Boots openeumen wördden in jaorbundels van populaire Britse strips, kwamen der in 't Verienigd Keuninkriek gien eigen albums van uut. Pas in 2020 kwaamp uutgeverije Rebellion mit Billy's Boots: The Legacy Of Dead-Shot Keen, een herdrok van een köppel vrogge verhalen. In Nederlaand was det aanders: daor verschenen van 1980 töt 2000 dreiendartig kleurenalbums van De wondersloffen van Sjakie, uutegeven deur Oberon en later deur Big Balloon. Töt en mit album 24 is 't tiekenwark van John Gillatt; daornao is 't van Mike Western. Gillatt maakte ok de umslagofbieldings speciaal veur 24 van de Nederlaandse albums. Waor in de Britse versie Billy Dane onder meer op de Groundwood School in 't verzunnen dörp Groundwood zit, zit Sjakie Meulemans op de Grunningse Oosterschool.

Al eerder, van 1973 töt 1975, had de strip in 't Nederlaandse stripblad Sjors estaone. Ampart veur de Sjors wördden der in 1975 een ende veur de riege verzunnen: Sjakie tiekent een contract en wördt profvoetballer. Dit ende wördden etiekend deur Jaap Vermeij.

Ok in aandere laanden verschenen de vertaalde aoventuren van Billy's Boots, zoas in Zweden vanof 1971 in de bladen Buster en Barracuda onder de name Benny Guldfot (Benny Goldenvoete). Dead Shot Keen het in de Zweedse versie Kanon-Keen of Kanon-Kid. In Finlaand het de heufdrolspeuler Benny Dane of Benny Kultajalka (Benny Goldenvoete) en zien grote veurbield Kanuuna-Keen. In 't Ieslaands het de jonge Kalli í knattspyrnu (Kalli de voetballer). De strip wördden ok in 't Bengaals ummezet en verscheen as Billir Boot in 't maondblad Shuktaara (in de Indiase dielstaot West-Bengalen). Billy het daor Bilash, Bili of Biley. In Turkije verscheen de riege in de jaoren zeuventig as Sihirli Ayakkabılar (Magische schoenen) in 't blad Doğan Kardeş; Dead Shot Keen is daor Bombacı Ken.

In Nederlaand verschenen albumsBewarken

  Dit artikel is eschreven in 't Zuudwest-Drèents.