Borkense Bane

De Borkense Bane is den name van de veurmoalige spoorliene tussen Wenterswiek en Borken (Duutslaand). De spoorliene wodden in 1880 deur Jan Willink an-elegd as onderdeel van de verbinding Zutfent – Wenterswiek – Dorsten – Bismarck. De Nederlandsch-Westfaalsche Spoorweg Maatschappij had de liene in eigendom en in bedrief.

De Borkense Bane

Veurgeskiednis

Den Achterhook, joarenlang ne vergetten streake, wodden deur et ‘iezeren peerd’ letterlek ontslotten. De eerste gode verbinding met de rest van et land was tot stand ekommen.

Moar wee-t dech dat de Wentersen in de riege stoanden um nen tocht te maken met 't spoor hef et mis. Lange blevven zie et spoor wantrouwen. Dat völt al op te maken uut kraantenartikelen dee in dee tied verschenen.

Ieverige krantenverslaggevvers dee den trein veurbi-j hadden zeen kommen getuugden van n monster dat niks anders dee as met zien schrille gefluut en aambörstig gepuf de peerde opschrikken en olde leu de stupen op et lief jagen.

Veur de leu was ‘dat ni-jmoodse gedoote’ in dee tied t gesprek van den dag. ‘Wee had zien laeven edacht da’k op mienen olden dag nog zo’n dink zol zien?’, zei den enen. ‘A’k ‘s margens in et bedde ligge en dat dink kump der langs dan schuddet mien ‘t bedde’. Wier nen ander zei: ‘Zo’n lokomotief snorkt net as ‘n old varken dat de keune zeugt.'

Wat doatems

• 21 juni 1880: Opening
• 4 maart 1940: Sluting veur reizigers
• 1979: Sluting veur goederenvervoer
• 1989: De NS dut in et kader van heuren 150sten verjoardag de liene ovver an Natuurmonumenten en de stichting Het Geldersch Landschap, hiermet is et lot van de liene bezeageld. Dee organisasies kriegt elk de helfte van de liene, dee in n natuurgebeed ligt.

De liene is veur et grootste deel op-ebrokken, woarunder et deel van Wenterswiek tot net veur de grenze (deel van Natuurmonumenten) en verskeiden stukken in Duutslaand. De rest ligt der nog, al is et begreujd mit plaanten.

De Borkense Bana is onderdeel van de spoorliene Zutfent - Gelsenkirchen-Bismarck

• 
  Borkense Bane an den Haverkampstegge in Kotten
• 
  Borkense Bane van Nederlaand noar Duutslaand
• 
  Borkense Bane van Duutslaand noar Nederlaand

Uutgaonde verwiezingen

• Ofbeeldingen van de Borkense Bane uut 2006