Dooldersum

Dooldersum (Nederlaans: Doldersum) is een klein esdörp in Zuudwest-Drenthe. 't Maekten vrogger diel uut van de gemiente Vledder, tötdet dizze mit de gemientes Dever, Dwingel en Haovelte opgonk in de ni'je gemiente Westerveld. Dooldersum lig vier kilometer ten noordoosten van Vledder en hef zo'n zeuventig inwoners. De streektael van Dooldersum heurt bi'j 't Drèentse Stellingwarfs, dat binnen de Drèentse dialecten as Zuudwest-Noord-Drèents wördt in-edield.

Ze weet niet sekuur hoe old of Dooldersum is, mar 't is een middelieuws plaetsien. De naeme Dooldersum bedödt de ooldste woonplaetse. Niet wied van 't dörp of ligt twei grafbulten uut de laete stientied of iezertied, die ze plaetselijk de 'mejoor' en de 'generaol' nuumt. Rond de brink staot zo'n tien boerderi'jen, een kefee-restaurant mit een camping en een 'Boekenhotel', ewi'jd an boekeri'je. Veur oaverige veurzienings wördt Dooldersum bediend deur Vledder.

Dooldersum greenst an 't Nationaol Park Drents-Friese Woold. 't Beekien de Vledder Aa en 't Dooldersummer Veld - een heidelaandschop in beheer bi'j Stichting Drents Landschap - heurt bi'j dit park. De boavenloop van de Vledder Aa is in 2002 en 2003 opni'j in-ericht. De beek, die in 't begin van de jaoren zestig ekanaliseerd wördden, hef zien oolde lope terogge kregen. De rieke boavengrond wördden of-eplagd. Now mut de netuur heur in 't laand tussen Dooldersum en 't plaetsien Waetern opni'j ontwikkeln.

Schrieveri'je

In dizze lieste vien ie boeken die over Dooldersum gaot.

• IJmker, Janne (2006), Achtendertig nachten (roman), Zoetermeer: Mozaïek

Buten dizze webstee

• Webstee van de gemiente Westerveld

Dit stok is eskreven in 't Zuudwest-Noord-Drèents.