Ennemoabörg
De Ennemoabörg (Nederlaands: Ennemaborg(h)) is een börg in Midwolle, gemiente Oldambt, in de pervincie Grunning. Vandage de dag wördt de börg beheerd deur stichting Het Groninger Landschap.
Feilijk is de Ennemaobörg gien börg mar een butenplaatse, umdet der gien adellijke veurrechten mit verknupt waren. De laandadel kun hum in de laandstreek Oldambt niet best ontwikkeln, deurdet Stad dit gebied al vrog in haanden kreeg.
Geschiedenis bewark
De Ennemoabörg is begund as stainhoes, een vrog soortement börg, det end 13de of in de 14de ieuw dalezet kan wezen. Naamgever kan een Sebo Emmens ewest hebben, die rond 1400 in de contreien van Midwolle en Scheemde leefde. Vanof 1598 kump de femilie Duircken of Diurcken veur as börgbewoners. Meugelk waren zij naozaoten van de Ennema's.
De olde Ennemoabörg, mit inmiddels vervalen torens, wördden tussen 1681 en 1695 haoste kats ofebreuken en vervöngen deur 't hudige vierkaante, symmetrische laandhuus. De binnengrachte hebt ze dichtemeuken. Ok in die tied wördden 't laandgoed rond de börg slim vergroot. Deur hielijken raakten de bewoners van de börg verbunden mit de adellijke Ommelaander femilies Alberda en Siccema.
End 18de, begun 19de ieuw raakte de börg vanneis in verval. In 1817 wördden e verkocht an beleggers die 't laandgoed te gelde meuken deur de verkoop van bomen uut de bos bij de börg. 't Huus zölf wördden beheerd deur rentmeisters. 't Was in dizze tied een veenbörg, een laandhuus veur dikke börgers in de Grunninger Veenkelonies.
In 1946 wördden 't laandgoed in beheer egeven an de Nederlaandse Heidemaotschopije. In 1965 wördden de börg, 't koetshuus, de beide keuterijen en vief boerenspillen die derbij heurden en de 362 bunder laand, mit de bos van 80 bunder, verkocht an Het Groninger Landschap. Dizze stichting leut 't spul restaureren. Op uutneudiging van Het Groninger Landschap huzeert sinds 1992 de keunstenares Maya Wildevuur op de börg, daor as ze ok heur galerie hef.
Wat der wieder bij de börg heurt bewark
Veur de Ennemoabörg lig een gazon mit stinsenplaanten, ok wal börgbloumkes enuumd, zoas de boerenkrokus, de bosgeelster, 't sneiklokkien of liedertien, de steernhyacint en de winterakoniet. Naost 't huus stiet een beuke van rond 1800.
't Koetshuus wördden in 1969 een eterije. De leiliendes veur 't koetshuus bint in de jaoren tachtig van de 20ste ieuw vanneis eplaant. Achter de börg lig een plasse, die meugelk diel uutemeuken hef van de olde grachte. Ok achter de börg hej een bos van 2,5 kilometer laank en 300 meter bried, liekas de börg eigendom van Het Groninger Landschap.
Op 't laand van de Ennemoabörg staot twee keuterijen, die töt de oldste huusies op Midwolle beheuren.
Zowal in Amsterdam as in Eindhoven hej een straote die Ennemaborg het; in Almere is der een Ennemaborgstraat.
|
Dit artikel is eschreven in 't Zuudwest-Drèents. |
|
Commons: Ennemoabörg - plaatjes, filmkes en/of gelüüdsbestanden. |