Friedrich Schnoor
Friedrich Schnoor (Hambörg, Duutslaand, 14 febrewari 1879 - ok daor, 25 juni 1966) was een Platduutse veurdrachtskeustenaor en schriever van varzen en vertellegies. In 't bezunder stund e bekend um veurdrachten uut 't wark van de klassieke schriever Fritz Reuter. Hij gebruukte de schrieversname Fiete Lüttenhus.
As kiend al kwaamp e deur de Lübecker schrievers Karl Kindermann en Gustav Falke in anraking mit de 'Platduutse beweging'. Zij hadden zien veurdrachtstalent in de gaten en fieterden zien beslissing an um hum daoran te wijden. Hij reisde stad en land of umme veurdrachten te holden. In 1910, 't honderdste geboortejaor van Fritz Reuter, stund e op de plaanken as die zien romanfeguur Onkel Bräsig. Twee jaor later reisde e hen Amerika en gaf in New York veurdrachten. Deur taandzeerte, vertelde e later, was e niet mit de Titanic mitegaone, zoas de bedoeling ewest had, mar mit een later schip.
De Eerste Wereldoorlog onderbrak zien bezigheden, en in de Slag an de Somme in 1916 kreeg e zwaor te lieden deur gasvergiftiging. Nao zien genezing kwaamp e as ziekenbroeder te warken; herstellende soldaoten kunden heur vernuvern mit zien Platduutse veurdrachten. Vanof 1943 woonde Schnoor in Loonborg (Lauenburg), een stadtien ten zuudoosten van Hambörg. Zien zeune Freddy (Friedrich-Karl) Schnoor hef een bulte teksten uut de naolaotenschop van zien va as e-boeken uutegeven.
Uutgaonde verwiezings
bewark
|
Dit artikel is eschreven in 't Zuudwest-Drèents. |