Frouwien Klaassens-Perdok

Frouwine Egberdine (Frouwien) Klaassens-Perdok (Wietwerd, 10 april 1917 - Hoaren, 9 meert 2006) was een Grunnings-Drèentse onderwiezeres, politica en schriefster in 't Drèents en Nederlaands.

Opleiding en wark

Ze was de middelste van vief kiender in een vrijzinnig boerengezin. Nao twee jaor maagies-ulo gunk ze naor de kweekschoele in n Daam en haalde daor de heufdakte um onderwiezeres te wörden. Ze warkte in vörmingscentrum 't Oldörp in Oethoezen en ontdekte daor de Grunninger literatuur. Ze haalde een mo-akte wiskunde en wördden in 1941 lerares an een internationale kostschoele van de quakers in Ommen, waor gevlochte Jeudse kiender verbleven. Twee jaor later kwaamp ze te warken an de volkshogeschoele in Bakkevene.

Nao de oorlog warkte ze in een tehuus veur NSB-kiender. Vanof 1948 gaf ze les an de mulo in Geeiten, waor ze heur anstaonde man, Harm Klaassens, leerde kennen. Toen ze in 1951 trouwden, kreeg zij ontslag umdet een getrouwde vrouwe destieds niet in dienst much blieven. Dizze gaank van zaken was ze 't lange niet mit iens.

Van 1958 töt 1982 was Klaassens-Perdok veur de Partij van de Arbeid raodslid in de gemiente Geeiten; van 1962 töt 1976 was ze wetholder. Van 1958 töt 1972 was ze lid van de Pervinciaole Staoten veur de PvdA. 't Huus van de Taol schrif:

Frouwien Klaassens-Perdok was een sociaal mèens. Dat hef ‘t fundament veur heur poletieke loopbaan west. [...] Het helpen van mèensen hef zin geven an heur leven. In de oorlog hölp ze jeudse kinder, nao de oorlog de kinder van NSB-ers, later de Surinamers en in ‘t leste diel van heur leven asielzukers.

Schrieverije

As Klaassens-Perdok grammietig was van 't politieke wark of heur verveelde tiedens Staotenvergaderingen, schreef ze kritische riempies aover heur politieke collega's. Dizze riempies waren 't begun van heur schrieverije. In 1970 gaf ze ze in eigen beheer uut onder de titel Spelleprikkies. Daorveur gebruukte ze de schrieversname Wipke, een koosname die heur va veur heur gebruukt had.

Ze was anesleuten bij de Drentse Schrieverskring en schreef ok tonielwark. Verhalen en gedichten van heur stunden in de tiedschriften Oeze Volk en Roet en in regionaole kraanten. Klaassens-Perdok schreef ok gedichten en verhalen veur kiender en een kienderboek; ze was lid van de warkgroep 'Drents op schoel' van Het Drents Genootschap. Elf verhalen en gedichten van heur staot in 't Drèents kienderboek (2004, Het Drentse Boek).

Mit Marga Kool verzörgde ze in 1984 de redactie van de karstbundel Midwinter in de olde Landschap (Het Drentse Boek), waor ok wark van heurzölf in stund. Wieder dreug ze bij an de bundels Midwinter II (1991, Het Drentse Boek) en Kersttied (2002, Het Drentse Boek).

Uutgaves

Spelleprikkies (1970, dichtbundel in eigen beheer, onder schrieversname Wipke)
Bonenzummerdie (1978, dichtbundel in eigen beheer, onder schrieversname Wipke)
Namen in en rond Gieten (Het Drentse Boek, 1983)
Poekie, het allerleeifste kattie van de hele wereld (Het Drentse Boek, 1984)
Er is gien neis under de zun; een verzameling gedichten en verhalen (2002, verzameling in eigen beheer van eerder uutegeven wark)

Citaot

Het ledikant dat was een boot,
wij vaorden over wilde zeeën.
Geen golf was oes te hoog;
wij duurden alles met zien tweeën

Wij waren een woest roverspaor,
besmeerden haor, gezicht en handen
met lippenstift en wenkbrauw-zwart,
Een buusmes har ik tussen tanden.

Uut 't gedicht 'Zeerovers', in: Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 75)

Bronnen

Henk Nijkeuter (2016), Waor roet en blommen wortel schiet in 't veld. Geschiedenis van de Drentse literatuur 1945-2015, Beilen: Het Drentse Boek (blz. 368-369)
Huus van de Taol aover Frouwien Klaassens-Perdok (eraodpleegd op 27 oktober 2021)
Geheugen van Drenthe: Frouwien E. Klaassens-Perdok (eraodpleegd op 27 oktober 2021)
Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 74-75)

Dit artikel is eschreven in 't Zuudwest-Drèents.