Gerard Vloedbeld

Gerard B. Vloedbeld, ok wa op zien Tweants: Vloodbeld^[1] (Ambt Almelo, 9 meert 1884 - Almelo, 17 november 1961) was nen skriewer den at drok was vuur de Tweantse sproake. Hee skreef nen machtigen hoop oawer geskiedenisse, tradisies en gebroekn van Tweante.

Leawnsbeskriewige

Meesttieds wör'e an esprökn as "meaister Vloedbeld", umdet det zien feaitelike woark was; hee was veertig joar laank boawnmeaister in Almelo.^[2] Vanof 1907 skreef'e vuur de Twentsche Courant. Doew at dee kraante verkocht wör noar Oldnzel, har Roomsk Almelo ginne kraante mear. Doarumme begun Vloedbeld met drukkerieje Lulof in 1921 de Nieuwe Twentsche en Almelosche Courant, woervan at de bladziedes vuural duur umzelf evuld wördn. Hee har doew al wat könnigheaid met t verleedn van Tweante, en wördn laankzaam-an ne anpriezer van t de Tweantse sproake en gebroekn, en vlot skriewer van t Tweants.

In de joarn '30 skreef'e stoark teegn t nazisme, woerdoer at de kraante tiedns de bezettige verböadn wör. In dee tied begun'e literair (skriefkeunstig) woark umme te zetn op Tweants, um an te teunn det Tweants ne "volle sproake" is, woerin at dr ruumte is vuur skriefkeunst. Doarumme wörd'e wal ezeen as n eerstn den at t Tweants op n heugerder plan probeerdn te kriegn. Ene van zinne bekeanste woarkn is t komiese Mans Kapbaarg, 'n grootsten leugenbuul van 't Tukkerlaand, wat verskeaidene moaln vanniesn herdrokt is. Mans Kapbaarg wör as n soortemeant van stripverhaal verwoarket in n 150 meter laank mozaïek an nen tunnelwaand an de Wierdnsestroate in Almelo.

Hee har völle bestuurlike funksies en was n oprichter en eerstn vuurzitter van n Tweantsen Skrieverskreenk, en redakteur van Twènterlaand en -leu en -spraoke.

Skrieverieje

Geschiedenis der Katholieke Kerk in tijd- en levensbeelden. Almelo, J.T. Sommer, 1912
Mans Kapbaarg, 'n grootsten leugenbuul van 't Tukkerlaand. Boorn, ten Tusscher, 1927
Ummezettings oet t Duuts van t woark van Augustin Wibbelt: Het veerde gebod, In oorlogstied (2 delen), Wildrops Hof, De Noalaotenschop. Oet ekömn in de joarn twentig bie Smit (Hengel) en Lulof (Almelo)
Schriewers in de Twentse Sproake. Almelo, van der Veen, 1954
Elckerlick in Twentse Sproake. Hengelo, Gigengack, 1960
Klootscheeterswedstried. Eanske, Witkam, 1969
Twentse Holskrabbels. Eanske, Witkam, 1969
Aole könnigheid. Eanske, Witkam, 1976
De Eawengellies van Mattheus, Marcus, Lucas, Johannes aoverzet in de Twentse sproak. Eanske, Witkam, 1984

Bronnen

↑ Beveurbeeld in Twenteland en leu en spraoke, nr. 7, 4e joargaank, 1959
↑ Ok t Handboek Nedersaksische Taal- en Letterkunde sprek van 'Meester Vloedbeld': Henk Bloemhoff, Jurjen van der Kooi, Hermann Niebaum en Siemon Reker (red.) (2008), Handboek Nedersaksische Taal- en Letterkunde, Assen: Van Gorcum, p.386

[1] Beveurbeeld in Twenteland en leu en spraoke, nr. 7, 4e joargaank, 1959

[2] Ok t Handboek Nedersaksische Taal- en Letterkunde sprek van 'Meester Vloedbeld': Henk Bloemhoff, Jurjen van der Kooi, Hermann Niebaum en Siemon Reker (red.) (2008), Handboek Nedersaksische Taal- en Letterkunde, Assen: Van Gorcum, p.386

[1]

[2]