Geert Wilders
Geert Wilders (Venlo, 6 september 1963) is nen Neerlaandsen politikus van de PVV (Partieje vuur de Vriejhaeid), en in naam van disse partieje ook fraksielaeider in de Tweede Kamer. Umdet de PVV gedoogpartieje was in de regearing oonder Mark Rutte, wat n meenderhaeidskabinet was wat bestond oet de VVD en t CDA, was he in 2010 metbedaenker van disse regearing.
Wilders köm in de politiek in 1997, toen at hee in de gemeenteroad van Utrecht köm. n Joar later wör he Tweede Kamerlid vuur de VVD. Doar was he al lid van seend 1989. Op 3 september 2004 stappen he oet dee fraksie en richten zinne eenmansfraksie Groep Wilders op. Doaroet grööien de Partieje vuur de Vriejhaeid, woervan he nog aait ennigst lid is. Noa de verkiezings in de Tweede Kamer van november 2006 wör he fraksievuurzitter van de PVV.
Wilders is bekaend um zin blondeerde hööre, zien in t butenlaand geboren moo, de kritiek wat he op de islam hef, en zinne maenings oawer immigrasie, vriejhaeid van oetsprekken en de staandpeunten van de islam. Tusken 2010 en 2011 leup der ne lange rechtzaak tegen Wilders; hee wör verdacht van haatzeeien en diskriminasie. De anklacht wör kracht bie ezat duur zinnen Fitna-film, den't he in 2008 oetbrachen. Op 23 juni 2011 wör he vriej esprökken.