Golden Hörn (Dullert)
De Golden Hörn was n stok vun de Dullert. t Is in verschaaidene stadioms ontstoan en het om en bie 1500 zien grootste oppervlak beriekt. Sikkom 100 joar loater woer begunt mit de inpolleren. De Golden Hörn (noar t Hollaands vertoald zol dat 'Gouden Hoek' wezen) lag tuzzen Scheemde, Zuudbrouk, Noordbrouk en Woldendörp en vörmde n soort fjord. Dit kwam deurdat t aan baaide zieden begrensd woer deur heugtes. Aan de westkaant ligt n lege rog dij ontstoan is, eerst deur aanwas, zo as t Hoogelaand hoog worden is, loater deur de duuntjes vun t rivierke de Menter Ai en loater weer deur aanwas. De Golden Hörn lag den ook woar of t rivierke vrouger streumd haar, dus faailieks woer t de mond vun de Menter Ai. Aan de oostkaant ligt t "Hoog van Finnerwol" dat ontstoan is deur laand-ies tiedens de lèste iestied. Dit hoog vörmt n soort van kom, dij vandoag aan n dag vuld is mit woater en t Oldambtmeer is.
Noam
bewarkDe noam Golden Hörn komt van de ploatsnoam Goldhorn, n loug dij verzopen is in de Dullert. t Was veurtieds n goud stee om koren te verbaauwen, vandoar t woord 'gold'. t Woord 'hörn' (Hollaands: (binnen)hoek) wordt in t Grönnegs ook wel broekt veur n 'gebied', zo as in de oetdrokken "doar in dij hörn/houk vun de pervìnzie/gemainte/t laand". Deurdat de Dullert nou ook n hörn haar woer de noam overnomen.
n Aander theorie woar of de noam vot komt is dat t fjord denken dee aan de zeetong in Konstantinopel (noudoags Istanbul) dij ook Golden Hörn (Törks: Altın Boynuz of Haliç) nuimd woer en dij de oldstad aan de noordziede schaaidt vun t kertaaier Galata.
Tegenswoordeg is de noam Golden Hörn nog weer te vinden in de Grönnegse noam Hörn veur Nieuw-Scheemda, dat in de veurmoalege Golden Hörn ligt.