Gré Seidell-Broekhuizen

Grietje (Gré) Seidell-Broekhuizen (Oranjeknaol , 1929) is een Drèentse dichteres en verhalenschriefster.

Zie hef töt heur tiende an 't Oranjeknaol bi'j Zwiggelte ewoond; daornao gunk 't gezin naor Echten. De mulo deu zie op 't Oveine en een huusholdkundige opleiding in Möppelt. As kienderverzörgster hef zie in 't Noorderhuis bi'j 't Oveine ewarkt, en as divverdaosietherapeut bi'j 't Rooie Kruus. In 1959 trouwden zie en sund woont zie in Eindhoven, daoras zie begun te schrieven.

Zie debuteerden in 1971 mit gedichten in 't maondblad inne Drèentse taal Oeze Volk. In dit blad, daoras zie sund vaste mitwarker van was, en in de Hoogeveensche Courant publiceerden zie ok verhalen. Zie hef bi'jedragen an verscheiden bloemlezings en hef lid ewest van de in 1996 ontbunden Drentse Schrieverskring.

't Centrum veur Taol en Letterkunde Drentse Taol schref oaver heur dichtwaark:

"Heur dichterschap is herkenbaor an een zörgvuldig taolgebruuk, traditionele vörm en wat thema anbelangt vaok natuurpoëzie. Zij schildert ’t laand waor ze van holdt. Staodigan kommen der ok wat persoonlijker motieven en deeipere geveuilens in heur waark naor veuren. Het gevaor van het te kleine, kneuterige en te bepaarkte wet ze knap te deurbreken deur heur zuver taolgebroek en het onverwachte in heur poëzie."

De schiere klaank van heur gedichten vien ie beveurbield in 't gedicht Kringloop (hier hej iene strofe):

Vergruid mit de grond

röst het verleden

mar 't heden bluit hoge

op humus van toen;

een durend proces

van opstaon en hengaon

van laogien nao laogien

een legge op de nes.

Ien 2005 meuk producent en streektaalanfieteraor Albert Haar in opdracht van Drentse Taol een schrieverspetret op video van Gré Seidell-Broekhuizen. 't Petret, det deur Drentse Taol verspreid wördt, mak diel uut van een riege videopetretten van Drèentse schrievers.

Uutegeven waark

• Oerkenblatties (gedichten, 1980, Assen: Hummelen)
• Regelrecht (gedichten, 1983, Assen: Hummelen)
• Tussenruumte (gedichten, 1989 , Zuudwolde: Het Drentse Boek)

Bronnen

• Broersma, Rouke (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Het Drentse Boek (p.126-127)
• Bladziede van Stichting Drentse Taol oaver de dichteres, mit een köppel gedichten
• Encyclopedie Drenthe Online

Voetnoten

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.