Harm Koops

Harm Koops (Assen, 1914 - 1977) was een Drèentse onderwiezer en Drèentstalige schriever.

Koops gruide op in Eksel. An de kweekschoele in Coevern volgde hij een onderwiezersopleiding. Vanof 1940 gaf e les in Den Haag. Hij leerde daor deur veur logopedist en kwaamp te warken an de School voor slechthorenden en spraakgebrekkigen.

Hij was lange tied gengelachtig. Nao zien ofkeuring in 1967 verhuusde hij mit de vrouwe naor Leeg-Soeren an de zuudoostraand van de Veluwe. Van toen of hef e haost niet meer eschreven; in plaatse daorvan pakte e 't schilderspenseel op.

Koops zien eerste gedichten verschenen in 't blad van de Drèentse verieniging van Den Haag. Hij was slim actief in dizze verieniging en wördden ok redacteur van 't blad. In 1953 wördden e lid van de det jaor operichte Drentse Schrieverskring en van 't Drents Genootschap. Wark van hum stund in de Drentse schrieversalmanak, Oeze Volk en Maandblad Drenthe. Hij schreef veurnamelk treditionele netuurpoëzie en anekdotische (gelegenheids)gedichten, vast van maot en riem.

Koops zien gedichten wördden in 1983 deur de Drèentse schriever Gerard Nijenhuis ebundeld onder de titel Harm Koops. Drent in de vrömde. Verzaomelde gedichten bij 'n kaander braacht en van een verantwoording veurzien deur Gerard Nijenhuis.

CitaotBewarken

De klompen maakt 'n haalve drei,
en met een briede zwei
ploft 't wit wied open,
met 'n klap as doffe dunder.
IJ kunt de droppels zien
in wiede kring tot under
de appelboom.
En weer, en weer, weit blaank en bol
het wasgoed.
De maande is vol,
't Kan an de lien.

Die, an de waslien vuult zuk zo riek,
ze bint op een feest en
de wind mak meziek.
Jongs en wichter daanst in de wind
zo woest, zo wild, zo mal...
An 't end van de lien speult de boks van 'n kind
As in 't veurjaor 'n kalf
veur 't eerst oet de stal.

Uut Harm Koops zien gedicht 'Wasdag', in: Klaas Kleine, Lukas Koops, Gerard Nijenhuis en Emmy Wijnholds (red.) (1994), Maandewark, Drèentse verhaolen en gedichten, Zuudwolde: Stichting Het Drentse Boek (blz. 131-132)

BronnenBewarken

  • Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 69-70)
  • Huus van de Taol aover Harm Koops (eraodpleegd op 26 oktober 2021)
  Dit artikel is eschreven in 't Zuudwest-Drèents.