Hennie van der Most

Hennie van der Most (Slagharen, 23 meert 1950) is een Nederlaandse ondernemer uut Oaveriessel. Hi'j koopt veurnamelijk olde bedriefspanden en bouwt dizze umme töt horeca- en vermaakscomplexen mit pebliekspriezen die nog lange niet zo gek bint.

Waandel

Van der Most is geboren as boerenzeune. Hi'j volgden drei jaor de LTS en had verscheiden baanties. In 1974 begund' e een haandel in old iezer. Zien recreatieondernemingen bint ontstaon uut een privé-zwömbad mit sauna in zien schure in Slagharen. De hiele buurte mocht d'r tègen betaling gebruuk van maken, mar de gemiente Hardenbarg verbood hum zien schure veur pebliek open te stellen. In 1980 kocht Van der Most daorumme een leegstaonde bontweveri'je in Slagharen umme d'r zwöm- en saunacentrum De Bonte Wever van te maken. Verscheiden aandere prejecten zolden volgen.

Van der Most stiet bekend as een eigenzinnige, pragmatische ondernemer die niet drok is op ambtelijke besluutvörming en gedetailleerde plannen op pepier. (Ver)bouwen en plannen maken döt e dan ok 't liefst tegeliekertied. Hi'j mag graag per helikopter reizen. Zien centeri'je wördden in 2003 deur 't maondblad Quote eschat op 34 miljoen euro.

Det jaor kwaamp d'r drokte rond Van der Most, naodet een lasser uut Kazachstan, die illegaal in dienst was bi'j een onderannemer, in Kalkar van een steiger völt en kwaamp te oaverlieden. In juli 2004 hebt ze Van der Most uutereupen töt miest markante Oaveriesselse horecaondernemer van 't jaor.

Van der Most is veurzitter van DGA Network, een belangenorgenisaotie van zölfstaandige ondernemers en directeuren grootandielholders mit 400 leden. In 2008 startten hi'j mit dit netwark een plan um, mit steun van verschillende maotschoppelijke sectoren, warkelozen an een vaste bane te helpen.

Bi'j de verschillende bedrieven van Van der Most warkt in totaal zo'n 2000 mèensen.

Bekende ondernemingen

(name, plaatse, oorspronkelijke functie van 't gebouw)

1985: Speelstad Oranje, Oranje, eerdappelmaalfebriek
1988: Preston Palace, Almelo, ziekenhuus
1994: Evenementenhal, Hardenbarg, tapijthal
1995: Wunderland Kalkar en Kernies Familienpark, Kalkar (D), kweekreactor Kalkar
2001: De Koperen Hoogte, De Lichtmis, Zwolle, watertoren
2003: Evenementenhal, Rieswiek (Zuud-Hollaand), bakkeri'je
2005: Evenementenhal, Gorinchem, distributiecentrum
2006: Vakantiepark Oranje, Oranje, koelcontainers, dichtegaone in 2014, verkocht in 2021
2007: Nordsee Spielstadt Wangerland, Wangerland (D), militaire basis
2007: De Vluchtheuvel, Nörg, pretpark (dichtegaone in 2007, ofebraand in 2010)
2013: Funpark Meppen, Meppen (D), energiecentrale
2017: Most Amusement Rides, Schunesloot, een bedrief det especialiseerd is in 't ontwikkeln van attracties (verkocht in 2021)
2018: Attractiepark Rotterdam, Rotterdam, AVR-terrein (in anbouw)

Daornaost hef Van der Most een bedrievencomplex mit onder aandere een iezerhaandel, een horecahaandel, een bouwhaandel in Schunesloot en drei kiprestaurants onder de name De Piri Piri.

In 2001 braandden De Bonte Wever uut. Van der Most wol anvankelijk 't zwöm- en saunaparredies herbouwen. End 2004 besleut e det niet te doen, umdet e de eisen die de pervincie Oaveriessel stelde te hoog vund.

In meert 2007 braanden Staalbouw Special Products hielemaole of. De braandweer wus de braand onder controle te kriegen, zodet de omliggende bedrieven gien schade ondervunden. As gevolg van de braand kwamen meer as 2500 tropische veugels en vissen um 't lèven. In 't verwoeste paand, det centraol lag op 't bedrieventerrein van Van der Most in Schunesloot, was de ondernemer tientallen jaoren eerder zien imperium begund.

Operatie Van der Most

Vanof juli 2009 prissenteert Van der Most 't MAX-pregramma Operatie Van der Most waorin e as bedrievendokter fungeert veur bedrieven in nood. De Britse ondernemer John-Harvey Jones (in 2008 oaverleden) prissenteerden in de vrogge jaoren '90 een soortgeliek pregramma onder de titel Troubleshooter veur de BBC. Later wördden dit pregramma eprissenteerd deur Gerry Robinson.

Bibliografie

Super Nederland, een helikopterview over ons land (2010, mit Henri Massen en Sabrina Barmentloo), ISBN 9789090256160

Rifferenties

Biografie van Hennie van der Most
Hennie van der Most wordt bedrijvendokter, Jonathan Ursem, Quote

Dit stok is eschreven in 't Zuudwest-Zuud-Drèents van de Drèents-Oaveriesselse grèensstreek.