De Lichtmis
De Lichtmis is een buurtskop an de A28 in de Nederlaanse pervincie Oaveriessel. Nao de gemientelijke herindieling van 2001 kwaamp 't diel ten zuden van de N377 bi'j de gemiente Zwolle en 't diel ten noorden d'rvan bi'j de gemiente Stappest (ter heugte van 't dörp Roevène).
De buurtskop lig an 't kruuspunt van de snelweg A28 van Zwolle hen Möppelt en de provinciaole weg N377 van Asselt hen Ni'jlusen. Bi'j de Lichtmis lag ok de ansluting van 't Lichtmiskenaal, det van de Vechte bi'j Zwolle kwaamp, en de Dedemsvaort. 't Lichtmiskenaal hebt ze edempt en de A28 is d'r oaverhen an-elegd.
De Dedemsvaort
bewarkDe Lichtmis hietten anvankelijk Het Pannenhuis en lag an de olde rieksweg Zwolle-Möppelt. De Dedemsvaort, die as vanuut Asselt hen 't oosten egraven wördden, kwaamp in 1809 an De Lichtmis. Bi'j De Lichtmis kwaamp Sluus II te liggen. 't Kenaal wördden deuretrökken langes onder aandere Den Hulst en De Vaort naor de Vechte bi'j Grambarge en mit een ziedtak, de Lutterheufdwiek, hen Coevern.
De Bisskopsskaanze
bewark
De opvatting det ze in 1592 al een verdedigingswark bi'j De Lichtmis nuumt bi'j een veldtocht van Maurits van Oranje zien leger hen Stienwiek is niet juust. Pas rond 1635 hebt ze hier een weg hen Zwolle an-elegd. Langes dizze ni'je route op 't noorden an wördden in 1665 een skaanze op-ewörpen: de Bisskopsskaanze. De verdediging van de vestige in 1665 in de stried ting bisskop Bernhard von Galen (later Bommen Berend enuumd) wör ebreuken deur een list. Zien saldaoten deuden heur veur as Nederlaanse verstarkingstroepen deur 't Wilhelmus te speulen mit det ze in 't tweiduustern ankwammen. Later die ieuw wördden de veureneumen uutbreiding van de skaanze uutesteld, waordeur de skaanze in 1672 niet of was en de bisskop dizze mit weinig muite innemen kun.
Accentuering van de skaanze
bewarkIn 1673 hebt ze de bisskop weer vort ejaagd. De skaanze is nooit of-emeuken en har al op 't end van de 17e ieuw gien militaire functie meer. In 1854 hebt ze de grachte dempt. De contouren van de skaanze bint in 't slotenpatroon zichtbaor eblèven.
In 2007 hef 't Waterskop Groot Sallaand ten noorden van de Dedemsvaort en ten oosten van de A28 in 't kader van 't vergroten van de waterbarging de contouren van de Bisskopsskaanze accentueerd. De sloten bint in de veur skaanzen kenmarkende stèernsvörm verbried en accentueerd mit behulp van een rietkrage. 't Skouwpad is vri'j toegaankelijk en veurzien van informaotiebrödties.
Bedrieven
bewarkBi'j De Lichtmis haj al in de 19e ieuw bedrievigheid. Zo was ter de gelieknamige harbarge en een korenmeule. In 1895 kwaamp De Lichtmis an de tramliende van de Dedemsvaartsche Stoomtramweg-Maatschappij te liggen. Dizze liende leup van 't spoorwegstesjon an 't kenaal (Dedemsvaart SS) hen Zwolle en wördden in 1947 esleuten.
An de westkaante van de A28 in de gemiente Zwolle stiet een veurmaolige watertoren. Véur de bouw daorvan in 1932 was 't water det in de umgeving uut de pompe of putte kwaamp vake broen vanwege de veenachtige umgeving en iezeroer. Mit de komst van de watertoren kwaamp der helder water uut de krane. Tussen 1993 en 2001 bouwde ondernemer Hennie van der Most de watertoren umme töt De Koperen Hoogte, een eteri'je mit een dri'jend restaurant in de top en verskeiden hotelkamers en vergaderruumtes op de verskillende verdiepings. Naost De Kopen Hoogte ligt partycentrum De Vijverhoeve en (langes d'Asselterweg) een recreatieplas.
An de oostkaante in de gemiente Zwolle hej wegrestaurant annex chauffeurscafé De Lichtmis, daoras ok een kapperszaak bi'j erönd wördt. Ten noorden hiervan in de gemiente Stappest lig 't kiprestaurant Piri Piri, ok een ondernemige van Hennie van der Most.
Beriekbaorheid
bewarkBusliende 40 (Zwolle - Möppelt - Stienwiek) en in de spits snelbus 83direkt (Zwolle - De Vaort) van Syntus stopt an De Lichtmis.
Uutgaonde verwiezing
bewark
|
Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek. |
 | Pläätsen en buurtskoppen in de gemiente Zwolle |  | |||||||||
|---|---|---|---|---|---|---|---|---|---|---|---|
Oaveriessel · Steden en dörpen in Oaveriessel Nederlaand · Previncies · Gemientes | |||||||||||
| | Plaatsen in de gemiente Stappest |  | ||||||
|---|---|---|---|---|---|---|---|---|
Oaveriessel · Steden en dörpen in Oaveriessel Nederlaand · Previncies · Gemientes | ||||||||