Keulkes

Keulkes (Brassica oleracea convar. oleracea var. gemmifera) wördn vuur t eerst in 1821 noabie Brussel ekweekt, en wör doarnoa al gaaw ne belangrieke weentergreunte in Europa. n Oorsproonkliken naamn is "choux de Bruxelles", wat nog aait in t Engelse Brussels sprout of t Zweedse brysselkål te zeen is. Keulkes wordt binn Europa vuural in Engelaand, Fraankriek, Neerlaand en België getn.

Keulkes wordt in Neerlaand vuural in Zuud-Hollaand, Flevolaand, Zeelaand en Noord-Broabaant ekweekt.

Rechtevoort wörd in de beroopskweek allene mear duur-ekweekte rasn gebroekt, dee at ne cillindriese spruutzetting hebt. Vroger wördn vuur beroopskweek zoadvaste keulkes gebroekt, dee at ne piramidevörmige spruutzetting hadn. Doarduur monn disse keulkes met de haande duur eplukt wordn, wat beteeknt det iederbod allene de riepste keulkes gebroekn konn wordn. Dit soort wörd rechtevoort nog gebroekt vuur persoonliken kweek, zo as in de volkshöfkes.

Smaak

Keulkes van vroger hadn mear den bekeanden smaak woer at de meeste wichter zonnen hekel an hebt, mear duur de nieje rasn is den stoarken smaak dr n betn of ekweekt, woerduur disse soortn wat mear egetn wordt. Keulkes köant vorst duurstoan van -15 °C. Umdet te könn zett de keulkes zetmel umme in sukers, wat zorget det ze neet bevreest. Doarumme ett de meeste leu keulkes t leefste as n vorst dr n moal oawerhen hef ewest.

Kokn en kloarmaakn

De meest gebroekte manere um keulkes terechte te maakn um te kokn is duur ze eerst van t loof of te haaln, doarnoa de rest van t stemke dr of te sniedn, en doarnoa de boetnste loage blaaks dr of te pulkn, dee at dan al lös warn ekömn duur t stamsniedn.
De meest vuurkomnde maneern van kloarmaakn beent kokn, steumn en reustern. Vuur t geliekmoatig kokn mu'j zorgn de'j keulkes hebt dee at allemoal eawn groot beent. Wat koks koarft n kruus in t midln van de stamanzet, um dr zo vuur te zorgn det t keulken volledig goar wörd. Wat vuur ne manere o'j ook gebroekt, iej munn zorgn de'j ze neet te lange loatt kokn. Hierduur keump t noar sulfur roeknde glucosinoat sinigrin vrie. Vake kriegnt leu keulkes te etn dee at te lange hebt ekokt. Doarumme veendt völle leu ze neet lekker. 6-7 Minuutn kokn is zat.

Inhoold

Keulkes hebt völle vitamine C en hebt wellicht n good effekt bie t teegngoan van kaanker (umdet ze glukosinoloatn bevatt). 100 Gram nieje ongekokte keulkes bevat:

Voedingsstöffe
- koolhydroatn: 5 g
- äjwit: 4 g
- vet: 0,5 g
Mineroaln
- kalk: 30 mg
- Iezer: 1 mg
Vitamines
- karoteen: 1 mg
- B1: 0,12 mg
- B2: 0,12 mg
- C: 150 mg

Neersassies

Tweants:
- keulkes (Eanter, Riesn)
- spruutn