Klaus Wunderlich

Klaus Wunderlich (Chemnitz 18 juni 1931 - Bittelbrunn bie Engen 28 oktober 1997) was nen Duutsen muzikaant. Hee kreeg bie mekoar 13 Gooldene Platen en een goolden muziekbeandke. Wunderlich was den eersten Duutsen popmuzikaant den as et elektroniese örgel bie et grote publiek populear maakten.

Leawen

Wunderlich gröaiden op in Chemnitz as zönne van nen politsie-inspekteur. Al met 16 joar was hee koorleader, mer de popmuziek treuk um toch mear an. In 1951 treuk Wunderlich met nen band noar Westduutslaand en "pingelden" as pianist in een kafee-trio duur heel Duutslaand. In dissen tied maakten hee ook naam met et Hammondörgel, wat vanof 1955 zin heuwdinstrumeant wör. "Et örgel is min leawen" en "met een Hammondörgel kö'j ieder striekinstrumeant noadoon, behalve een bottermes," zea Wunderlich. Hee treud in verskeadene kabaretten op as eankelspöller, töt at hee in 1958 oontdekt wör duur de platenmoatskoppieje Teldec. Noa een poar keer vuurspöllen, beuden dee um een platenkontrakt an.

In de zeuwentiger joaren bouwden hee in Waldbronn bie Karlsroehe nen eegnen studio en begun met den Moog-synthesizer te spöllen. Hee zol der dree langspölplaten met opnemmen. Op zin "Sound 2000 - Moog, Organ, Rhythm"-album oet 1973, wat zin Moog-debuut was, spölden hee klassiekers oet de volksmuziek. Hee wör vuural bekeand met zinne "New Pop Organ Sound": melodiejen spölden he met nen Hammond H100, terwiel as hee der geluudseffekten umhen maakten met WERSI-örgels W248S, Lowrey H25-3 en vanof 1997 oook de W2 Helios. Disse sound was neet in et echt noa te spöllen, umdet et in de studio in mekoar ezat was. Ene van zinne bekeandste konserten was in de Londense Royal Albert Hall.

Wunderlich gebreuk doarnöast ook nog de volgende örgels: Hammond C3, 0, Wersi W248S, Wersi Beta DX 400, Wersi Spectra CD700.

OP den 28sten oktober van 1997 kreeg Wunderlich bie zinne vrouwe Traudl en vreanden een hartanval in zin hoes in Bittelbrunn.

Mooi um te weten

• La Felicidad (van et album The Golden Sound of Hammond, ook bekeand as Hammond Für Millionen) was de achtergroondmuziek vuur de Belgiese tekenfilmriege van Kabouter Wesley, wat in Nederlaand vuural bekeand wör in et TV-programma Man bijt Hond.
• Den BNN-presentator Ruben Nicolai dut Wunderlich earen duur as zin zönne op te treaden in et BNN-programma Ruben vs Katja goes Europe, in de ofsnedes vuur Duutslaand, Spanje en Oostenriek.
• In Wageningen steet Huize Wunderlich', een studeantenhoes wat noar Klaus Wunderlich eneumd is.

Oetgoande koppelingen

• Klaus Wunderlich-Homepage, vuur et leste bekekken op 29 juli 2013