Kuuroord

plekke mit thermale of minerale waterbronnen die geneeskrachtig mut wezen

Een kuuroord is een plekke mit thermale of minerale waterbronnen die geneeskrachtig mut wezen. Mèensen trekt der henne veur de gezondheid, ontspanning en/of dieverdaotsie. Verblieven in een kuuroord veur lichamelijk en giestelijk welzijn wördt kuren enuumd. Mangs lig een kuuroord an zee of in de bargen en wördt ok de gezonde locht op pries esteld.

Baders in de minerale warmwaterbronnen van Vučkovec, Kroatië
De krukkenbrekerd, symbool van therapeutisch baden in 't kuuroord van de Slowaakse stad Piešťany

In kuuroorden wördt mineraalriek bronwater, warmwaterbronnen of mangs zeewater gebruukt veur 't baden um medische redens. Ie kunt der gewoonlijk verscheiden soorten gezondheidsbehandelingen kriegen, waor ok wal naor verwezen wördt as balneologie. Al sinds prehistorische tieden mient lu det mineraalriek water genezende eigenschoppen hef. In de Romeinse tied haj de thermae, publieke badcomplexen mit kold, lauw en hiet water en zwietruumtes. 't Gebruuk van mineraalwater veur de gezondheid kump wereldwied veur en bint ze veural in Europa en Japan drok op. In wat Europese laanden, zoas Duutslaand, wördt kuurpergramma's nog wal ies vergoed deur 't ziekenfonds.

Sinds 2021 staot elf Europese kuuroorden op de UNESCO-Wereldarfgoedlieste as onderdiel van de wereldarfgoedinschrieving Historische kuuroorden van Europa.

Terminologie bewark

't Woord "kuuroord" is ontliend an 't Duutse Kurort. Behalve veur de kuurinstallaties zölf, wördt 't ok wal gebruukt veur de stad of plaatse waor aj kunt kuren. In 't Engels praot ze van spa, spa town en spa resort, naor de Belgische stad Spa mit zien minerale bronnen. In of bij kuuroorden hej vake een hotel. Een kuuroord mit aovernachtingsmeugelijkheid nuumt ze in de Engelstalige wereld een destination spa. Een day spa daorentegen is een sauna waor aj gezondheids- en schoonheidsbehandelingen kunt kriegen, mar niet kunt slaopen.

  Dit artikel is eschreven in 't Zuudwest-Drèents.