Liquide middelen

Liquide middelen zint de aktiva in geld of andere beleggingen dee as rap in echt geld oetbetaald könt worden. Et geet meestal oawer geld in kas en tegood op de rekkening.

Liquide duudt op vlöaiboar: disse middelen kö'j in iederen vörm geten dee'j mer wilt: loon betalen, skold oflössen, een projekt vuursketen, een niej gebouw anskaffen, investeren, en zo wieder. Bedriewe hebt dus aait gerne wat liquide middelen achter de hande (of Twents ezegd: skoef vuur 'n doem), um kortlopende verplichtingen an te können. Van de andere kante is een oawerskot van liquide middelen neet gunstig, umdet de centen dan minder opleawert as wonnear'j der met zollen investeren of ze in et bedrief zollen stekken.

Strategische vuurroaden of duurzame beleggingen, machines en vastgood zint neet liquide. Toch kan nen ondernemmer neet-liquide zaken en zelfs et hele bedrief 'liquideren', dus ummezetten in geld, verkopen. As een bedrief oawer 'n kop geet, wördt 'n inbodel, de machines en et pand verkocht, um de nog te betalen kösten of te lössen.

Et kan wean at der liquide passiva zo as leningen zint. De netto liquide middelen zint dan den optelsom van de liquide aktiva (wearde van et egene bezit) en de oetstoande passiva (geld wat nog noar andere partiejen mut).

De moate van liquiditeit van aktiva of passiva hank of van de tied woerin as ze haalboar (aktiva) of opeesboar (passiva) zint. Zo hebt bievuurbeeld betalingen van klanten ne hoge likwiditeat (positief) en oetstoande bevuurroadingsbetalingen van et bedrief zelf (negatief).