Lochemsen Barg
Den Lochemsen Barg is nen heuvel van 49,2 meter, elaegen in den Geldersen Achterhook bi-j Lochem en Barchem. Et is ne reste van nen stuwwal, den in de veurleste iestied deur et land-ies is opeschoaven. Et estuwde materioal besteet uut ofzettingen van den Rien. In de lesten iestied bunt deur verslieting dallen in den Lochemsen Barg ontstoan. In dee tied was den stuwwal zelf neet begreujd, doarveur was et te dreuge en te kold. Et materioal wodden deur den wind van den stuwwal ebloazen en ingevongen in et umrengenden laeglaand.
Tussen de twee bargtöppe Lochemerbarg en de Kalenbarg ligt nen kwelplek, den zeugenoamden Duvelskolk. In et bultachtige laandschap gaevt dee twee bargen n mooi anzicht. Vanuut et zuden bunt ze in de wiete te zeen bi-j mooi weer. Vanof den barg ku-j veural vanof de Barchemse en Zwiepse kante arg wiet kieken.
Geskiednis
bewarkVrögger was et gebeed Lochemsen Barg, Kalenbarg markegroand. Op de zi-jkante van den barg waren enken dee as akkerlaand in ebruuk waren. In de eerste helfte van de 19de eeuwe wödden dee markegroanden verdaeld under gerechtigde leu. Dizzen maakten hier woold of bouwlaand van, woardeur et grootste deel van den barg woold wödden. Noa talrieke schenkingen en ankopen kwam völle groand in hende van et Geldersch Landschap. In 1934 schonk de gemeente Lochem n stuk groand van ruum 28 bunder, under veurweerde dat dizze oppervlakte in 15 joar verdubbeld zol mötten waen. Geldersch Landschap slaagden doar al noa 6 joar in, deur n antal schenkingen. In 1977 wödden uut et legoat van vrouw ir. E.F. van der Ban n deel van et veurmoalege laandgood 'de Enk' verkreggen, woarvan de rest al eerder verkreggen was. In dee tied wödden groanden in arfpacht an-enommen van de Stichting Twickel.
Witte Wieve
bewarkOp de noordpunte van den Kalenbarg ligt de in de streke bekende Witte Wievenkoele, doar ku-j 's oavends en 's nachts 'witte wieve' teggenkommen. Zi-j loat iederene mit n zuver gewetten ungemeujd, moar bunt nen schrik veur den boosdooner. Woarschienlek is et ne olde leemgroove.
Belvedere
bewarkOp den top van den Lochemsen Barg steet de Belvedere. Et is nen slanken uutzichttoorn den ze in 1893 hebt ebouwd en vandage neet meer toogänkelek veur kiekleu is. Wieter stoat doar ok nog et 19de eeuwse wonhuus 'Barghuus', n boswachtershuusken mit nen stal.