Malt

Malt of mout is oetkommend en edreugd groan. Et is nen groondstof vuur beer, sake, jeneawer en whiskey en vuur een poar aandere leawensmiddel.

Kristalmalt van garste

Et meestbroekte groan vuur malt is garste en dan vuural brouwgarste woer as weainig eiwit in zit. Mer feaitelik kö'j alle soorten groan gebroeken en zelfs bookweat. Garste is et beste te gebroeken, umdet der de gode enzymen inzitt en umdet et kafvleesken de blad- en wörtelkiem better beskaarmet as bie aandere groansoorten.

Malten

Et maken van malt neumt ze malten. Dit doot ze in ne malterieje. Kort ezegd löt ne malterieje groankorrels oetkommen en dan dreugen. Bie et oetkommen komt enzymen vrie. In de groankorrels zit zetmel, wat duur de enzymen umme zat wörd in gistende sukers. As de neudige verhoolding van enzymen en zetmel bereikt is, wörd et oetkommen van de korrels estopt. Et wörd non greunmalt neumd. Dit greunmalt wörd edreugd, wat ze eesten neumt. Later bie et brouwen, bie et maisken, geet et ummezetten van zetmel in sukers verdan. Disse sukers wordt later (deels) alkohol.

Et gef verskeadene oarden malt. Dit haank of van de dreugwieze: wo länger en heter as et verhit wörd, des te doonkerder de malt (en doarduur ook den beer). Ze mett dit in EBC: de kluurslag van et malt wörd vergelekken met de kluur van verskillende verhooldingen van jodium en water.