Man van Mander

Den Man van Mander is nen afdrük van en veanelyk wat in 1958 evünden is by Mander, in de twentske gemeynde Tübbige. In disse streake is de grund döärgåns wat suur. Dat hevt et feitelike lyv med bütte un al kats vordebeaten, un de vrykummende un untbindende lyvssappen hebbet oaver de jåren de grund wat verklöörd. Ümdat der by den afdrük en mesken evünden is, gåt geleyrden der vanuut dat et nen kearl was, mär et kan ouk mär sou ne vrouwe eweasd weasen.

Wat upvalt by et lyk is dat et gin vöte likt to hebben. Der wör anvangelik emeynd, dee sollen rituääl afehakked weasen üm to vöärkummen at den geyst van den douden weader in de beyne solde kummen un rundspöyken. Mär uut wyder undersöök blikt at et allens to maken hevt med dee vetten un lyvssappen. In vöte sittet der neet souvöäle van in un soudöänig köm der ja ouk ginnen afdrük van.

Den Man van mander is evünden as deyl van ne upgraeving van allerhande prehistoriske saken uut et Vasser Gravveld, en geheyl van sou'n 20 gravhöävels med ürnen, pötte, syrråden un warktüge as bylen un messen. Et heyle spül stamt uut de nye steyntyd van 5300 töt 2000 v. K. of de vroe brunstyd of ysertyd van 3000 jår weaderümme.