Tubbige (ok: Tubbig of Tubbeargen, Nederlaands:Tubbergen) is ne gemeente in et noorden van Tweante (proveensie Oaveriessel). Op 1 januwoari 2020har de gemeente 21.279 inwonners (bron: CBS) en ne oppervlakte van 147,40 km². De gemeente Tubbige heurt bie de plusregio Regio Tweante.

Gemaente Tubbige
Vlagge van de gemeante Tubbige Waopn van de gemeante Tubbige
(Vlagge van Tubbige) (Waopen van Tubbige)
Lokatie van de gemeante Tubbige
Lokatie van de gemeante Tubbige
Informasie
Proveensie Oaveriessel
Heufdplaatse Tubbige
Geografie en bevolking
Öppervlakte
 - Laand
 - Water
147,41 km²
146,98 km²
0,42 km²
Inwonners
Bevolkingsdichtheid
21.279 (1 jannewoari 2020)
145 inw./km²
Koordinaten 52° 24′ N, 6° 46′ O

Koördinaoten: 52° 24′ N, 6° 46′ O

Aoverig
Belangrieke verkeersaoders N343, N349
Netnummer 0541, 0546
Postkode 7614-7619, 7650-7669, 7679
Offisiële webstie www.tubbergen.nl

Et doarp en de gemeente het vanoalds Tubbige. In et gemeentewoapen stoat dree goalden beargen, wat wis noar de naam Tubbergen. De naam zol kommen van te Upberge, meant de Etymologiebanke, en steet al seed 1312 in de beuk.

De gemeente Tubbige is van naam de meest kattelieke gemeente van Nederlaand. Dat is te vernemmen an dat der nog heel wat leu alle wekken noar de keark goat. Ok stemt hier in deursnid de meeste leu van Nederland veur et CDA. Veural de döarpe roond de heufdplaats Tubbige bint hechte gemeenschoppen.

Groten andachttrekker in et doarp Tubbige is de Sunt-Pankratiusbasiliek. De Sunt-Pankratiuskeark wör in et joar 2000 deur paus Johannes Paulus II anwezzen as basiliek. Et spul is bouwd in niejgotische stiel. Vrogger stund der op dee ster ne öaldere keark. Nen toorn van Beantemer zaandsteen oet de viefteende eeuw steet der nog. De niejgotische keark is der teggen-an bouwd

Den oalden toren heurt de börgerlike gemeente, net zoas de meeste kearktorens in Nederlaand van veur 1789. Dat wör zo reggeld in de Bataafse Stoatsregeling van 1789. In 1806 bevestigen et könnink Lodewiek-Napoleon nog es. Dat den torend op naam van de gemeente Tubbige bieskrevven wör bie et Kadaster hef nog doerd töt in de joaren '80 van de twintigste eeuw.

De basiliek is veural bekend van de glas-in-lood-roeten van vief geslachten oet de glassniedersfamilie Nicolas. Deur disse glas-in-lood-roeten kwammen ze in Tubbige op et idee van et kulturele evenement "Glasrijk Tubbergen". Op dit evenemeant könt glaskeunsteners oet heel Uropa eer glaskeunst loaten zeen.

In et doarp he'j dree scholen: twee leagere scholen, De Wiekslag en De Marke, en de middelboare schole, et Sunt-Canisius. Alle andere döarpe der umhen hebt ok wa ne basisschool. Openboar onnerwies, dat kent ze nich in de gemeente Tubbige. Alle scholen bint of katholiek of protestaants-kristelik. De basisschool in et Maanderven, woar de bevolking vanolds wat meer mengd is, hef ne neutraal-biejzunnere achtergroond.

Nen bekeanden Tubbiger was politiekman en preester Herman Schaepman (1844-1903). Den hef völ goods doan um de Rooms-Katholieken in Nederlaand voortan te helpen. In Tubbige steet nog een groot broonzen standbeeld veur em, een keunstweark van beeldhouwer August Falise, den in zien tied oardig bekend was.

Alle joaren doot ze in Tubbige nen verlichten Karnavalsoptocht holden. Hier komt mear as 40.000 kiekers op of oet et hele laand.

Kerne bewark

De gemeente Tubbige hef tien officiële kerne (döarpe) en dree officiële boerschoppen zoonder eagen kern (Hoarle, Hezingen en Maander). Et gemeentehoes steet in et heufddoarp Tubbige.

Antal inwonners per woonkern op 1 januari 2004:

Tubbige 4480
Geesteren 2370
Albeargen 2120
Haarbig 900
Langeven 800
Vas 670
Reutum 660
Maanderven 630
Fleringen 480
Maander 390
Mariaparochie 320
Hezingen 210
Hoarle 130

Bron: CBS / webstie gemeente Tubbige

Gemeentebestuur

  • Börgermeister: Wilmien Haverkamp-Wenker
  • Wethoalder: P.J. (Pieter) van der Vinne (CDA)
  • Wethoalder: H.B.M. (Henny) Oude Geerdink (CDA)
  • Wethoalder: J.E.F. (Jos) Harmelink (PvdA)

Bekeande leu oet Tubbige bewark