Margarete Veckinchusen

Margarete Veckinchusen, boaren Witte, (* üm 1382 in Ryge, letsk Rīga, – † nå 1433, möäglik in Lübeek) weer en hanseaatske koupvrouw, dee vöär earen man Hildebrand Veckinchusen dat leid van dat bykontoor in Lübeek had un dår med sükses mang ander den transport van holt, visk, dook un kopper öäver de Oustsey un wyder dat land döär organiseer.

Lätste syde van den breev, den Hildebrand Veckinchusens an den 18. januårmånd 1422 uut den skuldtoorn in Brügge an Margarete skreyv. De breevwessel twüsken Margarete un Hildebrand Veckinchusen givt belangryke möäglikheiden in to kyken in partnerskop, familenleavend un de rulle, dee vrouwenslüde in den handel spealen kunnen, in de tyd van de Hanse.

Leavend

Margarete Veckinchusen weer de dochter van den rygesken koupman Engelbrecht Witte. Nå den doud van Hildebrand Veckinchusen syn eyrste vrouw büdt Engelbrecht Witte em in dat jår 1398 syn 15-jårige dochter Margarete as tweyde vrouw an. Disse vorbinding is höyvdsaaklik as familiäre vorknütting van de koupmansfamilens dacht un skal ünder ander earen man belangryke handelskontakten in Lyvland vorskaffen.

Tosamen med Hildebrand het see - so bekend - söäven kinder: dree deerns (Gertrud, Margarethe un Anna) un veer söäns (Jost, Johannes, Engelbrecht un Hildebrand). Med ear kinder leavt Margarete in Lübeek, wårneam see dat leid van dat bykontoor het, bydes ear man van Brügge uut den internationalen handel drivt, mang ander med Venedye, un dår vaken risikos by up sik nimt. As Hildebrand sik vorspekuleert, deep in de skulden landt un vöär en dree jårs tyd in den skuldtoorn in Brügge sit, mut Margarete al ear good in pand geaven, med ear kinder ear huus in Lübeek vorlåten un dat later vorköypen, un in armood to hüür woanen. Ear swåger Sivert Veckinchusen givt ear man dat nöydigste, dat see ni beddelen to gån behöövt, ümdat en beddelerske in de vorwandskop ouk syn eygen anseend skaden dån had. Ear man Hildebrand keyrt nümmers torüg nå Lübeek, man nå syn vrykoamend uut den skuldtoorn 1926 blivt hee up de öävervaard doud.

Representatioon in de media

In den tweyden deyl van den ZDF-dokumentatioonsfilm Die Deutsche Hanse (2/2): Eine heimliche Supermacht – Die Deutsche Hanse am Wendepunkt öäver den koupman Hildebrand Veckinchusen spealt Simone-Adrienne Kern de rulle van Margarete.

Literatuurvorwysings

Disse artikel is skreaven in holsteynsk, in de Nysassiske Skryvwyse.