Neidrèents

Neie woorden in alle variaanten van 't Nedersaksisch kuj vienden op de ziede aover neosassismes.

Neidrèents is de term veur neologismen - nog niet zo lange leden uuteprakkezeerde woorden - in 't Drèents. Dizze neologismen wördt wal bedacht veur stoere woorden, mangs van vrömde ofkumst, of veur de aordigheid of as gekheid.

Veurbeelden van Neidrèents bint openeumen op de webstee van de organisatie Drentse Taol en in heur uutgaove De Taolkraant, en in 't boekien Taalgids Drenthe (kiekt bi'j de rifferenties). Dizze neologismen bint Midden-Drèentse vörms. De mieste bint samenstellings van Drèentse woorden die al bestaot. Vake mut die samenstellings schier klinken deur medeklinkerriem, zoas wat + wuj + wichie = watwujwichie (receptioniste/tillefoniste), of klinkerriem, zoas liekbekieker (patholoog). Partie Neidrèentse woorden gebruukt typisch Nedersaksische uutgangen, zoals oetperbeerderij (try-out).

Der bint weinig anwiezings det Neidrèents méér is as taalspöl deur individuele uutprakkezeerders. De neiviendings raakt niet ingebörgerd onder Drèentstaligen, die neie woorden miest onveraanderd, of mangs anepast an Drèentse klaanken, aoverneemt uut 't Nederlaands of (beveurbield veur computertermen) uut 't Engels.

Veurbeelden

Computerwoorden van Drentse Taol : bewaorplaotie (cd-rom) computerkwebbel (chatten) computertiek (computervirus) deurstreper (deleteknoppe) doewknop (enterknoppe) gapplaotie (cd-kopie) inktbakkie (printercartridge) net-brief / lienpost (e-mail) netventer (provider) ofdrukker (printer) oflien, oplien (offline, online) pielschoever (computermoes) plaotiesmaoker (scanner) praotzeefie (microfoon) revelduus (chatbox) spiegelplaot (compact disc) tussenfrommelknop (insertknoppe) web-knup (verwiezing naor een webpagina) zuker (browser)

Algemiene woorden uut Taalgids Drenthe : aodersmeer (cholesterol) bonnenberend (verbalisant; naor Bommen Berend) hoelbessem (stofzoeger) kenaolscheuveln (zappen) körkentrekker (alcoholist) kruusveter (g-string) meleurtillefoon (alarmliende) moskeebaos (imam) mosroppen (verticuteern) naokommerdie (caravan) navvelbeslag (navvelpiercing) ogenroet (mascara) opknapstee (kuuroord) piemelpuutie (condoom) roegtefiets (mountainbike) snoefsnei (cocaïne) straotscheuvels (skeelers) tetvulling (börstimplantaot) zaodventer (spermadonor)

Rifferenties

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.