Neurofunk

Neurofunk (vake ofekorted töt neuro) is nen düüsteren understyl van drum and bass wat tüsken 1997 en 1998 unstünd in Londen in Groutbrittannie. Et is ne voordsetting van techstep. Et is nen jachterig anvölenden musikstyl med en tempo van rund de 170 BPM en swåren nådruk up de drums wat en når verholding simpel ritme anholdet. De verwysing når funk kümt van de swåren nådruk up den eyrsten tel en synkopeerde ritmes. Kenmarkend is ne düüstere verwrüngene baslyne den as korte 'versköävene' stoaten gevt med dåroaverhen geluudssnippers van andere slagwarkachtige elementen, industriele geluden en flarden van spröäkene upnames, wårdöär as der en ingewikkeld ritme untsteyt. Ouk elementen van techno, house en jazz kummet vöär. Af en to wördt der oaverhen erapped, vake in jamaikaansk patois of engelsk med londensk aksent. Den vlaamsken musikkenner Kwinten Crauwels ümskreav Neurofunk as "de natuurlike musik van de harsens: neurologiske chemiske stoffen vloiet en vleget rund en formet obskure en fynsinnige emotys." Den engelsken musikjuurnalist Simon Reynolds ümskreav et in syn book Energy Flash: A Journey Through Rave Music and Dance Culture (1998) as "ne erotisering van angstgevööl."

Vöärnaam in neurofunk (en in vöäle soorten elektroniske musik) is et towarken of upbouwen når den 'drop', et ougenblik dat den swåren bas der by in kümt. Dat vöölt an as ne ård höygdepunt, uutkumst of slotsumme. Dit kan bereiked worden döär geluudsfragmenten händig an steyds wyder te verwringen med en filter, de tounhöygde up te draien of et ritme uut te bouwen med ne verdubbeling van de slagen.