Hunebed van Stienwiekerwold

Et hunebed van Stienwiekerwold (O1) was een hunebed uut de jonge stientied dat ston bi'j et hudige dörp Stienwiekerwold in de perveensie Overiessel. De vondstplaese is op laandgoed De Eese. Et veurmaolige hunebed is inedield bi'j de westelike groep van de Trechterbekerkultuur.

Petrus Camper zien tiekening en beschrieving uut 1781 van et hunebed van Stienwiekerwold

Et hunebed van Stienwiekerwold is ien van de twee hunebedden waorvan bekend is dat ze hebben estaone in wat now Overiessel is. Et aandere ston ten noordoosten van de Twentse buurtschop Maander.

Onderzuuk

Et hunebed wodden veur et eerst vermeld in 1781 deur netuuronderzuker Petrus Camper, perfester an de Franeker Akkedemie, die d'r een tiekening van maekte. In dat jaor was et hunebed nog niet bezunder beschendeliseerd. Toen hunebedonderzuker perfester Albert van Giffen in 1918 de plekke bezocht, trof e een kaele vlakte zunder keien an. Hi'j deu archeologisch onderzuuk; een diel van de staandspeuren bleek verdwenen te wezen. Dat gaf an dat et hunebed hiel krekt esloopt was. In plaese van verkleurings op 'e plekken waor de keien hadden estaone, was d'r iene grote verkleuring zichtber.

Uut 'e staandspeuren die d'r nog wel waren, kon ofeleid wodden dat et hunebed opebouwd was uut zes of zeuven paer ziedstienen. Waorschienlijk waren d'r zes dekstienen. De vondsten dateerden uut 3300-2950 v.Chr. Et hunebed kreeg volgens et koderingssysteem van Van Giffen de kode O1. Et is aans niet finaol zeker of de deur Van Giffen evonnen resten om etzelde hunebed gaon as dat op Camper zien tiekening.

Onderzuuk in 1985 onder leiding van Jan N. Lanting hef uutewezen dat d'r een stienkraans om et hunebed elegen hef, die as ok esloopt is. Lanting konkludeerde dat et hunebed zo'n veertien, vieftien meter laank ewest hef. Op grond van de grootte kan et, zoas bi'j de mieste Nederlaanse hunebedden om een gaankgraf egaone hebben: een grafmonument mit een gaank naor de grafkaemer.

Bi'j de opgraevings bin schaorten van eerdewarken potten evonnen, die typologisch bi'j de westgroep van de Trechterbekerkultuur heuren en uut de periode 3300-3074 veur Chr. stammen.

Bronnen

• Hendrik Gommer (2017), Mythische Stenen. Deel 1: Nederland, Mythicalstones.Eu
• InfoNu.nl: Ook Friesland, Groningen en Overijssel hadden hunebedden
• The Megalithic Portal: O1 De Eese - Chambered Tomb in Netherlands in Overijssel

Dit stok is eschreven in et Stellingwarfs van de Kop van Overiessel.